***** عودت روحي على الموت المفاجئ

عودت روحي على الموت المفاجئ كثرت الصدمات تكتل
من جفيتي اعيوني جثه امجبله الصوب انتظارج
أوشالة ايامي الاخيره ابلا حياة
وكمت احس بيهن سنابل يابسات
وأياسن يتنوعن عالغيم
هلبت زخه من ميها واخضر من جديد
_2_
ولو ترد بيه الحياة اكبر مصيبه
اشلون انسى وذكرياتج عصفت ابراسي شظايا
والتروح اويه الوكت تترك أثر محفور ماصدك يروح
يلي اسمج جان يتشلبى الفكر يتشلبى حايط ذكرياتي
وهسه انه الحمد لله
ابلا فكر لاذكريات اثنينهن راحن اوياج
_3_
هسه خايف خوف واحد باجر ايموت
اويه ليله ابلا بخت ماصبره ابجلمة امواسه
وركض لحضان الفجر
وابواهس اعلى الموت شو شدحيله
...
كون اكابر وانه بجنازه مماتي !
كون اكابر وانه حدر اتراب كبري
كون اكابر مثل امس من جنتي ليه
اشلون اكابر وامشي مابين الشماته ومشية السكران صارت اصحى مني.....
_4_

فارس احلامج
جنت
جا هسه وين ابياحلم وابيا مكان
جان كلشي البيج ينطرني امجيلج
جانت اجفوفج موانئ
تنتظر جفي سفينه وترسى مابين الاصابع
وانه لحظه اتأخرت فات الاوان
_5_
المحبه اتصير مسرح للجريمه
واحد ايخلونه قاتل
واحد ابدور الضحيه
والتكتلك انه شاهد وانه مثلت الضحيه
أتعوديت اعلى الغرابه
ياغرابه راح واضح التسميه انسميها قسمه
وماافك باب العتاب والله مااعتب عليج
امنين ابدي
وانه من روحي اخجلت من شفت ايدنه بيديج
-6-
ابلا كلب رحت انه اباركه واعزي الروح
هينه وشدي حيلج
يلا راحت

انته يل ماخذه مني
جيت اوصيك ابوصيه
هاي وصله تدري من كلبي خذته
انه شكرك انته ماكصيت وصله
كلبي من صدري شلعته.................

يسلمو اخي