كيف تعرف ابن عمان ؟! سؤال ابكى الملايين !!!

كيف تعرف ابن عمّان؟ سؤال ابكى الملايين ، يعني بسهولة ممكن تعرف الخليجي ، و اسهل من السهولة بتميز المصري ، و يا الهي كيف بتشيل اللبناني و السوري متل الشعرة من العجين ، بس ابن عمّان كيف تعرفه ، بما انه عمّان عبارة عن حضارة اختلاط لهجات ، ما في حدا بحكي زي التاني و مافي لهجة محدّدة ، هيك بتحسها لهجة سوريّة بس بدون مط للكلام و بدون “آل و أُلنا ” ، مرات بتحسها لبناني على خليجي ، و سعات بحس حالي بتكلّم مصري بس بدون هز وسط ، فاهمين علي؟ فش عنا لهجة محددة ، و الي بزيد الطين بلّة و بحط ملح على الجرح و اجا يكحلها عما ابوها هو انه ابن عمّان بتتغيّر لهجته حسب موقعه أو حسب مكان تواجده ، او حسب (الزرف- الظرف- الضرف) الي هو عايشه بلحظة معيّنة.
طيب خلينا نسرح شوي ، شو سبب هدا الحكي؟ ممكن اختلاط الأصول؟ ما بظن لأنه احنا تربينا مع بعض و تعلّمنا حكي مع بعض ، ممكن فش عنا لهجة اصلا؟ هل اضطراب لهجتنا هو السبب الرئيسي الذي جعل الراديوهات يجيبوا لبناني يحكي عنّا ، معنا ،لإلنا؟ يا سيدي مش موضوعنا الأسباب ، موضوعنا انه لازم نعمل لهجة نمشي عليها ، مش معقول في المقابلات الرسمية نحكي ” القاف قاف ” و في الشوارع نحكي “القاف مثل الجيم في مصر” و لما نكون مع بنت نحكي “القاف آاف” ، زكرتوني بشوفير التاكسي الي بتخوت على طنط فراح حكى تأسي بدل تكسي ، انه التكسي كاف مش قاف يا أهبل.
اوف كيف راحت عن بالي انه في ناس بحكوا القاف كاف و في ناس بحكوا “الكاف اتش” ، جد فش عنا لهجة و جد الحروف العربية كلهم صاروا يخابطوا في بعض و صار بدها عمّك ابو الحروف ، و شو بالنسبة لبنات عمّان الي بحكو عربي بس “انجلش اكسنت”؟ جد كيف زابطة معهم؟ بتكون في بيت اهلها بتحكي “شو هاظ زي الشبط بكاع المزبلة” بس تنزل على الشارع بتحكي “شو هاد يعو” ، خلينا نتخيل انو بنت بدها تحكي الجملة التالية “انا اليوم نزلت على سوق الخظرا و شريت كيلو بطاطا عشان اقليها لاخواني ، اجا واحد قليل أدب طقّص علي” ، شوفوا كيف رح تحكيها البنت و ركزوا منيح “انا اليوم نزلت على سوء خدرا عشان اخواتي جاي عبالهم فرايز ، بس فجأة اجا واحد مؤرف تأس علي .. يعععووووو”.
سؤال يطرح نفسه و حير علماء وابكا ملايين: مين حكم على اللهجات و قرر انو هاي لهجة فايعة وهاي لهجة حفرتلية وهاي لهجة زلام؟ و ليش احنا سكان عمّان كتير مزيفين و سطحيين لدرجة بتخلينا نغير لهجتنا (إلي مش موجودة اساساً) عشان نرضي الناس؟ عمرك شفت مصري بحكي أردني؟ لبناني بحكي اردني؟ سوري بحكي اردني؟ اذن لازم العمّاني يحكي عمّاني و بس.
انا كنت امزح لما حكيت انه ما في عنا لهجة ، لهجة غريبة من نوعها ، لهجة مخلّطة فلسطيني على اردني ، لهجة بنكهة عصرية و مفهومة لكافة الاذواق ، لهجة جميلة و راقية لو بس نفهمها وما نلبس قناع السطحيّة ، لهجة ذو ابعاد بتودينا لمكان بعيد ، مكان بدا في ترابط اخوي وطني منذ بداية المملكة الأردنية الهاشمية ، الموضوع مش موضوع لهجة و بس ، الموضوع تاريخ و حضارة ، نحن لسنا بحاجة الى خزنة او اهرامات حتى نحكي عن حضارة عريقة أهملها التاريخ ، نحن لسنا بحاجة الى اسهم ترفع مستوى الاخبار التجارية حتى نتكلّم عن عمّان ، ولكو هاي عمّان كلمة تزول تدريجيا بين سطور البرجوازية و السطحية ، و احنا اهل عمّان نمارس عمليّة تطور في الغلاف الخارجي فقط ، ولكو هاي عمّان في خزنة قصص منحوتة على جدرانها ، و الاف البيوت القديمة المائلة على و الى اصحابها ، ولكو هاي عمّان فيها قضايا معلّقة و سوق الطلياني العظيم ، دبي عندها ابراج بس عمّان عندها برجين السادس (أصبعين موجهين لأي مدينة ممكن تفكر حالها احلا منّا) ، و لكو هاي عمّان عم بتضيع من ادينا ، هاي عمّان وهاي لهجتنا الي بتزكرنا برابطة اخوية بدت مع بداية دولتنا ، انسوا القناع السطحي البشع لانو مش لألنا ، اتزكرو عمّان لانها حلو و لألنا .

نيكولاس خوري

اهالي عالم اربد الكرام بانتظار ارائكم وتعليقاتكم على الموضوع ورأيي بالموضوع رح يكون بعد ارائكم الكريمة ^^

عندك كلمات مناقضه لموضوعك
عم بتضيع، لألنا...... كلمات غير اردنيه
بشكل عام موضوعك حلو
واحنا الأردنيين لازم نفتخر بلهجتنا الأصليه وما نستحي منها

موضوع فعلا رائع ..............................

كل شيء بالدنيا بتغير و حتى اللهجة معرضة للتغير و هذا شيء طبيعي جدا و ما المانع من نغيرها

بصراحة انا ما عندي مشكلة تغير اللهجة مع مرور الوقت بس اهم شيء الشب يحافظ على لهجتة لانة شباب هل ايام مايعين بدون ما يغيرو لهجتهم فكيف مع أل و ألنا

حلو الواحد يحي لهجته متل ماتربى عليها
ولازم الناس ما يتخوتوا عل لهجات

مش شرط نحكي ال و النا اهم شئ تكون لهجتنا ناعمة و بسيطة
اصلا لو كل واحد يعرف اصله و فصله ما بغير لهجته

صح في منّه هالكلام .

بعرف انه صح ..و الا ليش حكيته
شكرا على كل حال

بتعرفي إنه صح..؟
غريب
هههههههههههههههههه

شو الغريب

التغير اذا مافيها ضرر وتكلف حلو

حلو نحكي باسلوب هادئ وكلمات وحروف مفهمومة

كل شي تطور واللهجة بتطور مع الزمن والعلم والتعلم

وهي لهجتنا الاردنية فيها شوية صعوبة وفيها تضخيم للحروف

يعني اذا في كلمات اسهل وابسط ليه لا

احنا الاردنيه مثلنا مثل غيرنا كل منطقه الها لهجه معينه
يعني مثل ما شفنا ببعض الردود في اعضاء ما بيفهموا علينا شو بنحكي
عشان هيك التنويع باللهجه مطلوبه احيانا
وعمان فيها من كل الملل
فيها الربداوي وفيها الكركي والطفيلي والمفرقاوي وكل المدن الاردنيه
وفيها الاردني والفلسطيني والعراقي والخليجي وغيرهم
حسب اللي اقبالك

فعلا احكي حسب المكان اللي انت فيه
او حسب الشخص المقابل الك

صح يا ام زيد
يعني لما كنا نحكي بالتش وما اتش في كثير ما كان فاهم علينا
وزي الحماط بالكركي في كثير ناس ما بتعرفها انها رمان ههههههههه

إحكي بلجتك ولا تخجل
ليش انت تحكي بلهجة اللي قبالك واللي قبالك ما يحكي بلجتك؟

عقبال ما نشوفك بتحكي ال و النا
هههههههههههههههههههههه

علي عليان كتب:: إحكي بلجتك ولا تخجل
ليش انت تحكي بلهجة اللي قبالك واللي قبالك ما يحكي بلجتك؟

مهو يمكن ما يفهم عليك

زين كتب:

علي عليان كتب:: إحكي بلجتك ولا تخجل
ليش انت تحكي بلهجة اللي قبالك واللي قبالك ما يحكي بلجتك؟

مهو يمكن ما يفهم عليك

ويمكن انا ما افهم عليه
شو الحل؟

استعين بصديق
وه وه وه

واه واه واه
حلوه منك ال وه وه وه زوزو

عشان تفهمها انها نفس ضحكتك
وه وه وه

وع وع وع

طيب شو هاي فسر ما فهمت
باي لهجة بتحكي

حلاوتنا بلهجتنا يا عمي

يعني بالاتش وعد

زين كتب:: طيب شو هاي فسر ما فهمت
باي لهجة بتحكي

هاي عمدا مشان ما تفهميها
هههههههههههههههههههههههه

انتهى زمن الاتش يا زين و بلش عصر جديد

الحلو بالاردني انه عندة قدرة لاتقان اي لهجة

هههههههههههههههههههه
حلوة منك

kingsam كتب:: انتهى زمن الاتش يا زين و بلش عصر جديد

الحلو بالاردني انه عندة قدرة لاتقان اي لهجة

اكيد سام اصلا اللي بحكوا بالاتش ماتوا
و مش غلط نطور لهجتنا للافضل

هههههههههههههه شو موتهم
بعد في منهم جيوب مقاومة هنا و هناك ههههههههههههههه جاينهم جاينهم

تغيير اللهجة بنحتاجه لما يكون الشخص المقابل النا مو فاهم لهجتنا ...
ومعك حق نايف ...بعض المصطلحات الربداوية هاد اذا مو كلها ما بيفهموها علي منيح بفكروها هندي ,ههههههههه
بس الرائع والجميل انو ما تندثر هاي اللهجات

اي دخيل الله ما احلى اللهجة الربداوية

في قرى بالاردن لسه محافظة على هاللهجة وما رح تتغير اصلا

Renin كتب:: تغيير اللهجة بنحتاجه لما يكون الشخص المقابل النا مو فاهم لهجتنا ...
ومعك حق نايف ...بعض المصطلحات الربداوية هاد اذا مو كلها ما بيفهموها علي منيح بفكروها هندي ,ههههههههه
بس الرائع والجميل انو ما تندثر هاي اللهجات

اي دخيل الله ما احلى اللهجة الربداوية

دخيل الله ما أحلاكي على هالكلام!

هلا هلا ...هلا خالي

هلا بالحلوين

Renin كتب:: تغيير اللهجة بنحتاجه لما يكون الشخص المقابل النا مو فاهم لهجتنا ...
ومعك حق نايف ...بعض المصطلحات الربداوية هاد اذا مو كلها ما بيفهموها علي منيح بفكروها هندي ,ههههههههه
بس الرائع والجميل انو ما تندثر هاي اللهجات

اي دخيل الله ما احلى اللهجة الربداوية

وما احلى ردك يا رنين تسلمي
احتشي مليح وغير هالحتشي ما بينفع

عمّان عبارة عن حضارة اختلاط لهجات ، ما في حدا بحكي زي التاني

و اجا يكحلها عما ابوها

ابن عمّان بتتغيّر لهجته حسب موقعه أو حسب مكان تواجده ، او حسب (الزرف- الظرف- الضرف) الي هو عايشه بلحظة معيّنة.

مش عارفة ليش هالعجقة هاي كلها واضح انه هالموضوع عامل أرق للاخ خوري ^^ ......

شو سبب هدا الحكي؟ ممكن اختلاط الأصول؟ ما بظن لأنه احنا تربينا مع بعض و حكي مع بعض ، ممكن فش عنا لهجة اصلا؟

يعني كل اشي ممكن امشيه إلا شغلة انه مافش عنا لهجة اصلا وعارفة انه باخر الموضوع تم ذكر انها هالشغلة مزحة لكني شايفيتها (دغ ب لغ )

موضوعنا انه لازم نعمل لهجة نمشي عليها

نعمل لهجة نمشي عليها ؟!!! طيب طيب مش عارفة اذا الاخ خوري بمزح ولاشو بالزبط لكن من قرائتي للموضوع كأني اكتشفت شغلة وهي انه واضح انه هالمقال (جدلا) هو اول اشي بتكتبه بحياتك لانه ركيك بدرجة ملحوظة للجميع^^ نعمل لهجة !!! والله تخينة

زكرتوني بشوفير التاكسي الي بتخوت على طنط

ههههههههههههههههههههههههه هاي بالذات ضحكتني وخاصة بعد ماكملت حادثة التخويت على رأيك ^^ والشاطر بفهم ^_*

سؤال يطرح نفسه و حير علماء وابكا ملايين: مين حكم على اللهجات و قرر انو هاي لهجة فايعة وهاي لهجة حفرتلية وهاي لهجة زلام؟

غريبب هالسؤال حير العلماء وابكى الملايين !!!!!! لا جد تخينة من دون اي مجاملة

يعني اي واحد قادر على التمييز بين اللهجة المايعة (واللي صاحبها طاب عليها طبة) وبين اللهجة الحفرتلية وبين اللهجة الاصلية لاي شخص على الرغم من تعدد الاصول ^^

المهم نزلت هالموضوع وردي عليه ناقد بالدرجة الاولى

ممكن تكون الفكرة لهيك موضوع واردة لكنها لاتطرح بهكذا اسلوب متناقض والله يا اخ خوري من طريقة كتابتك واضح انك اول مره بتجرب تكتب ممكن مثل ماهو واضح انك تفتقد للهجة تتحدث بها يعني بهالموضوع الواحد بحسك جامع من اللهجات ونازل بهالدنيا هههههههههههههههههههههه وبتحكي مافش عنا لهجة اصلا وانه الاردني لهجته عبارة عن خليط متعدد من اللهجات (مش عارفة ليش هون يستحضرني المثل اللي بقول "الجمل ما بطلعش على عوجة رقبته "^^),,,,,,,,, وفوق كل هذا بتعلق (متمسخرا ) على انه الاردني ما بتقدر تميزه بسبب تعدد لهجاته الضاربة بين سوري ولبناني وخليجي ووووووووووو الخ >>>>>>>>>>>مع انه الاردني الوحد بقدر يميزه من بين مليون

لأكون اكثر صدقا عنوان الموضوع هو اول ما لفت انتباهي ولما قرأته ضحكت ولهيك قررت انقله ^_*

كان هذا نقدي للموضوع ويتبع الرد على ردودكم الكريمة

تسلم نايف ..هاي السوالف chيف لعاد

ههههههههههههههههههههه
الله يسلمتش يا رنين
حلو الكلام هيتش صح بس مين ما بيفهمه خلينا نترجم

السلام عليكم
شكرا لك اخت مجد على اختيارك لهذا الموضوع ولو ان تعليقك جاء افضل من المقال
نفسه ....
ولم افهم من كاتب المقال كيف يريد ايجاد لهجه موحده لاهل عمان ؟ اولكل الاردنيين ؟ ..... هل نحن بلا لهجة ؟
اما من يحاول تغير لهجته الاردنيه باي لهجة كانت فهذه حريه شخصيه ولو ان ذلك
فيه امتعاض من الناس ، وانا شخصيا افضل التحدث بلهجتي الاردنيه لكن لا استطيع
فرض ذلك على غيري ، وحسب اعتقادي ان من يتحدث بغير لهجته هو من باب التجمل
فقط .... اما ان يتحدث اي كان بغير لهجته استعلاء على لهجته واحتقارا لها فليس
لدي قول له الا ... الثوب المستعار لا يدفئ ...

شكرا لكم

ههههههههههههههههههههههههه
حلوة دغ ب بدغ

مش غلط الواحد يطور نفسه
اللباقة مطلوبة بكل شي حتى باللهجة

ثقافتنا يفترض تظهر بأنماط عيشنا كلها هاد الشي البديهي
و التأقلم و التكيف مع اي وضع صفة وضعها الله بكل الخلائق فما بالك بالبشر ؟

و لو انه بكتير احيان الطبع بيغلب التطبع

هاي ........... كيفكم.مناح

السلام عليكم
جخه

شكرا لكم

مهو حتى السلام لهجات

السلام عليكم
صح بدانهم

شكرا لكم

السلام عليكم
قوك

ههههههههههههههههههههههههههههههه

شلونكم

ههههههههههه
مليحين انت شلونتش

اني زينة

علي عليان كتب:: عندك كلمات مناقضه لموضوعك
عم بتضيع، لألنا...... كلمات غير اردنيه
بشكل عام موضوعك حلو
واحنا الأردنيين لازم نفتخر بلهجتنا الأصليه وما نستحي منها

تماما في تناقض واضح بين فكرة موضوعه وطريقة كتابته

مشكور علي وحياك الله