كيف تعرف ابن عمان ؟! سؤال ابكى الملايين !!!

تذكير بمساهمة فاتح الموضوع :

كيف تعرف ابن عمّان؟ سؤال ابكى الملايين ، يعني بسهولة ممكن تعرف الخليجي ، و اسهل من السهولة بتميز المصري ، و يا الهي كيف بتشيل اللبناني و السوري متل الشعرة من العجين ، بس ابن عمّان كيف تعرفه ، بما انه عمّان عبارة عن حضارة اختلاط لهجات ، ما في حدا بحكي زي التاني و مافي لهجة محدّدة ، هيك بتحسها لهجة سوريّة بس بدون مط للكلام و بدون “آل و أُلنا ” ، مرات بتحسها لبناني على خليجي ، و سعات بحس حالي بتكلّم مصري بس بدون هز وسط ، فاهمين علي؟ فش عنا لهجة محددة ، و الي بزيد الطين بلّة و بحط ملح على الجرح و اجا يكحلها عما ابوها هو انه ابن عمّان بتتغيّر لهجته حسب موقعه أو حسب مكان تواجده ، او حسب (الزرف- الظرف- الضرف) الي هو عايشه بلحظة معيّنة.
طيب خلينا نسرح شوي ، شو سبب هدا الحكي؟ ممكن اختلاط الأصول؟ ما بظن لأنه احنا تربينا مع بعض و تعلّمنا حكي مع بعض ، ممكن فش عنا لهجة اصلا؟ هل اضطراب لهجتنا هو السبب الرئيسي الذي جعل الراديوهات يجيبوا لبناني يحكي عنّا ، معنا ،لإلنا؟ يا سيدي مش موضوعنا الأسباب ، موضوعنا انه لازم نعمل لهجة نمشي عليها ، مش معقول في المقابلات الرسمية نحكي ” القاف قاف ” و في الشوارع نحكي “القاف مثل الجيم في مصر” و لما نكون مع بنت نحكي “القاف آاف” ، زكرتوني بشوفير التاكسي الي بتخوت على طنط فراح حكى تأسي بدل تكسي ، انه التكسي كاف مش قاف يا أهبل.
اوف كيف راحت عن بالي انه في ناس بحكوا القاف كاف و في ناس بحكوا “الكاف اتش” ، جد فش عنا لهجة و جد الحروف العربية كلهم صاروا يخابطوا في بعض و صار بدها عمّك ابو الحروف ، و شو بالنسبة لبنات عمّان الي بحكو عربي بس “انجلش اكسنت”؟ جد كيف زابطة معهم؟ بتكون في بيت اهلها بتحكي “شو هاظ زي الشبط بكاع المزبلة” بس تنزل على الشارع بتحكي “شو هاد يعو” ، خلينا نتخيل انو بنت بدها تحكي الجملة التالية “انا اليوم نزلت على سوق الخظرا و شريت كيلو بطاطا عشان اقليها لاخواني ، اجا واحد قليل أدب طقّص علي” ، شوفوا كيف رح تحكيها البنت و ركزوا منيح “انا اليوم نزلت على سوء خدرا عشان اخواتي جاي عبالهم فرايز ، بس فجأة اجا واحد مؤرف تأس علي .. يعععووووو”.
سؤال يطرح نفسه و حير علماء وابكا ملايين: مين حكم على اللهجات و قرر انو هاي لهجة فايعة وهاي لهجة حفرتلية وهاي لهجة زلام؟ و ليش احنا سكان عمّان كتير مزيفين و سطحيين لدرجة بتخلينا نغير لهجتنا (إلي مش موجودة اساساً) عشان نرضي الناس؟ عمرك شفت مصري بحكي أردني؟ لبناني بحكي اردني؟ سوري بحكي اردني؟ اذن لازم العمّاني يحكي عمّاني و بس.
انا كنت امزح لما حكيت انه ما في عنا لهجة ، لهجة غريبة من نوعها ، لهجة مخلّطة فلسطيني على اردني ، لهجة بنكهة عصرية و مفهومة لكافة الاذواق ، لهجة جميلة و راقية لو بس نفهمها وما نلبس قناع السطحيّة ، لهجة ذو ابعاد بتودينا لمكان بعيد ، مكان بدا في ترابط اخوي وطني منذ بداية المملكة الأردنية الهاشمية ، الموضوع مش موضوع لهجة و بس ، الموضوع تاريخ و حضارة ، نحن لسنا بحاجة الى خزنة او اهرامات حتى نحكي عن حضارة عريقة أهملها التاريخ ، نحن لسنا بحاجة الى اسهم ترفع مستوى الاخبار التجارية حتى نتكلّم عن عمّان ، ولكو هاي عمّان كلمة تزول تدريجيا بين سطور البرجوازية و السطحية ، و احنا اهل عمّان نمارس عمليّة تطور في الغلاف الخارجي فقط ، ولكو هاي عمّان في خزنة قصص منحوتة على جدرانها ، و الاف البيوت القديمة المائلة على و الى اصحابها ، ولكو هاي عمّان فيها قضايا معلّقة و سوق الطلياني العظيم ، دبي عندها ابراج بس عمّان عندها برجين السادس (أصبعين موجهين لأي مدينة ممكن تفكر حالها احلا منّا) ، و لكو هاي عمّان عم بتضيع من ادينا ، هاي عمّان وهاي لهجتنا الي بتزكرنا برابطة اخوية بدت مع بداية دولتنا ، انسوا القناع السطحي البشع لانو مش لألنا ، اتزكرو عمّان لانها حلو و لألنا .

نيكولاس خوري

اهالي عالم اربد الكرام بانتظار ارائكم وتعليقاتكم على الموضوع ورأيي بالموضوع رح يكون بعد ارائكم الكريمة ^^

هاي ........... كيفكم.مناح

السلام عليكم
جخه

شكرا لكم

مهو حتى السلام لهجات

السلام عليكم
صح بدانهم

شكرا لكم

السلام عليكم
قوك

ههههههههههههههههههههههههههههههه

شلونكم

ههههههههههه
مليحين انت شلونتش

اني زينة

علي عليان كتب:: عندك كلمات مناقضه لموضوعك
عم بتضيع، لألنا...... كلمات غير اردنيه
بشكل عام موضوعك حلو
واحنا الأردنيين لازم نفتخر بلهجتنا الأصليه وما نستحي منها

تماما في تناقض واضح بين فكرة موضوعه وطريقة كتابته

مشكور علي وحياك الله

سوسنة الأردن كتب:: موضوع فعلا رائع ..............................

حياكم الله سوسنة

kingsam كتب:: كل شيء بالدنيا بتغير و حتى اللهجة معرضة للتغير و هذا شيء طبيعي جدا و ما المانع من نغيرها

بصراحة انا ما عندي مشكلة تغير اللهجة مع مرور الوقت بس اهم شيء الشب يحافظ على لهجتة لانة شباب هل ايام مايعين بدون ما يغيرو لهجتهم فكيف مع أل و ألنا

اها سام لكن فكرة الموضوع هي انه الشب الاردني يحكي بلهجة ثانية يعني بلهجة بلد ثاني سوري لبانبي .......... الخ ويستحي بلهجة بلده

ممكن احنا نحكي بطريقة جدا لطيفة ولكن نضل ضمن نطاق اللهجة الاردنية

حرف ساقط كتب:: حلو الواحد يحي لهجته متل ماتربى عليها
ولازم الناس ما يتخوتوا عل لهجات

اكيد حرف حلو كل واحد يحكي بلهجته ومايستحي منها

زين كتب:: مش شرط نحكي ال و النا اهم شئ تكون لهجتنا ناعمة و بسيطة
اصلا لو كل واحد يعرف اصله و فصله ما بغير لهجته

صح لسانك ام زيد بامكنا نحكي بطريقة لطيفة لكن باللهجة الاردنية كأردنيين مش ضروري الفزلكة

om adam كتب:: التغير اذا مافيها ضرر وتكلف حلو

حلو نحكي باسلوب هادئ وكلمات وحروف مفهمومة

كل شي تطور واللهجة بتطور مع الزمن والعلم والتعلم

وهي لهجتنا الاردنية فيها شوية صعوبة وفيها تضخيم للحروف

يعني اذا في كلمات اسهل وابسط ليه لا

واللهجة الاردنية اذا حكيناها صح مفهومة للجميع ومسموعة يعني لهجتنا مش طفشة كثير ومزعجة ومش شرط تكون اللهجة حروفها (مقلوبة وينقلب فيها الحروف الذال ينلفظ زين والدال تاء وووووالخ) حتى تكون لطيفة

وعلى ما اعتقد انه اجمل ماباللهجة الاردنية هو المخارج الصحيحة والسليمة لحروفنا ^^

نورتي عزيزتي ام آدم

nayef al-zo'uby كتب:: احنا الاردنيه مثلنا مثل غيرنا كل منطقه الها لهجه معينه
يعني مثل ما شفنا ببعض الردود في اعضاء ما بيفهموا علينا شو بنحكي
عشان هيك التنويع باللهجه مطلوبه احيانا
وعمان فيها من كل الملل
فيها الربداوي وفيها الكركي والطفيلي والمفرقاوي وكل المدن الاردنيه
وفيها الاردني والفلسطيني والعراقي والخليجي وغيرهم
حسب اللي اقبالك

اها اكيد كابتن لكل منطقة بالاردن لهجة لكن كل الاشخاص بالاردن على اختلاف مناطقهم بنقدر نفهم على بعض ويفهم علينا اي شخص من اي دولة ثانية اذا حكينا باللهجة الاردنية الصح اللي مخارج حروفها سليمة يعني والله العظيم لهجتنا ما بتخلينا نحتاج نحكي مع السوري باللهجة السورية او مع العراقي باللهجة العراقية او غيرهم لانها مفهومة واللي حاب يسمع هاللهجة يسمع لسمو الامير حسن باي مقابله له (الله يطول عمره)

علي عليان كتب:: إحكي بلجتك ولا تخجل
ليش انت تحكي بلهجة اللي قبالك واللي قبالك ما يحكي بلجتك؟

صح لسانك استاذ علي

زين كتب:

علي عليان كتب:: إحكي بلجتك ولا تخجل
ليش انت تحكي بلهجة اللي قبالك واللي قبالك ما يحكي بلجتك؟

مهو يمكن ما يفهم عليك

ام زيد اللهجة الاردنية بذات مفهومة للجميع يعني الواحد مش ضروري يلوي لسانه مع البناني مثلا وهو بامكانه يحكي بلهجته الاصلية المفهومة

وانا بحكي عن اللهجة الاردنية

theredrose كتب:: حلاوتنا بلهجتنا يا عمي

على راااااااااسي وعد والله انك نشمية

زين كتب:: يعني بالاتش وعد

بالاتش وبغيرها ام زيد واللي بحكي بالاتش بعرف يحكي اللهجة الاردنية الصحيحة ^^

kingsam كتب:: انتهى زمن الاتش يا زين و بلش عصر جديد

الحلو بالاردني انه عندة قدرة لاتقان اي لهجة

مش انتهى سام لكن( الاتش ) خاصة ببعض المناطق ومازال استخدامها وبالاضافة انه اللي بحكي فيها قادر على انه يحكي باللهجة الاردنية الصحيحة (عارفة هاي المرة العاشرة يمكن بحكيها بردودي لكن بشدد عليها لانه الاصل بلهجتنا الاردنية مفهومة للجميع مخارج حروفنا صحيحة)

زين كتب:

kingsam كتب:: انتهى زمن الاتش يا زين و بلش عصر جديد

الحلو بالاردني انه عندة قدرة لاتقان اي لهجة

اكيد سام اصلا اللي بحكوا بالاتش ماتوا
و مش غلط نطور لهجتنا للافضل

وحدي الله حجة شو ماتوا ما ماتوا ههههههههههههههههههههههههه والله وقت اللزوم غير الحكي بالتش مابفش غلي

لا ياعمي حكينا الاتش خاصة ببعض المناطق وفي لهجة اردنية صحيحة كل المناطق بتقدر تحكي فيها

ههههههههههه قال ماتوا قال

kingsam كتب:: هههههههههههههه شو موتهم
بعد في منهم جيوب مقاومة هنا و هناك ههههههههههههههه جاينهم جاينهم

إقظب إقظب ههههههههههههههههههههه ياعمي هاي اللهجات ما (بتموتش )

واذا انكوا ناويين تموتوها رح اكون بأول صفوف المقاومة للعلم ^_*

Renin كتب:: تغيير اللهجة بنحتاجه لما يكون الشخص المقابل النا مو فاهم لهجتنا ...
ومعك حق نايف ...بعض المصطلحات الربداوية هاد اذا مو كلها ما بيفهموها علي منيح بفكروها هندي ,ههههههههه
بس الرائع والجميل انو ما تندثر هاي اللهجات

اي دخيل الله ما احلى اللهجة الربداوية

صح لسانها رينينو الرائعة

يسعد اربد وكل ناسها المقيمين فيها والغير مقيمين ^_*

عمر قديسات ابو صهيب كتب:: السلام عليكم
شكرا لك اخت مجد على اختيارك لهذا الموضوع ولو ان تعليقك جاء افضل من المقال
نفسه ....
ولم افهم من كاتب المقال كيف يريد ايجاد لهجه موحده لاهل عمان ؟ اولكل الاردنيين ؟ ..... هل نحن بلا لهجة ؟
اما من يحاول تغير لهجته الاردنيه باي لهجة كانت فهذه حريه شخصيه ولو ان ذلك
فيه امتعاض من الناس ، وانا شخصيا افضل التحدث بلهجتي الاردنيه لكن لا استطيع
فرض ذلك على غيري ، وحسب اعتقادي ان من يتحدث بغير لهجته هو من باب التجمل
فقط .... اما ان يتحدث اي كان بغير لهجته استعلاء على لهجته واحتقارا لها فليس
لدي قول له الا ... الثوب المستعار لا يدفئ ...

شكرا لكم

وعليك السلام والرحمة ابو صهيب

صح لسانك وسلمت يمينك على ردك الوافي والرائع

للاردنيين لهجة جميلة مخارج حروفها صحيحة ومفهومة للجميع ويجيدها كل الاردنيين على الرغم من اختلاف لهجاتهم من منطقة لمنطقة او من قرية لقرية منا من يتحدث (بالاتش) واهل الجنوب لهجتهم بدوية ووووووووووالخ من المناطق الاردنية لكن الاردنيين كافة قادرين على التكلم بلهجة واحدة مفهومة للجميع

اما المستحي بلهجته وبحكي بلهجة ثانية فعلا احنا غير قادرين على تغييره لكن مثل ما تفضلت الثوب المستعار لا يدفئ

ابوصهيب الله محيي اصلك اشكرك

Jasmine collar كتب:: ههههههههههههههههههههههههه
حلوة دغ ب بدغ

مش غلط الواحد يطور نفسه
اللباقة مطلوبة بكل شي حتى باللهجة

ثقافتنا يفترض تظهر بأنماط عيشنا كلها هاد الشي البديهي
و التأقلم و التكيف مع اي وضع صفة وضعها الله بكل الخلائق فما بالك بالبشر ؟

و لو انه بكتير احيان الطبع بيغلب التطبع

هههههههههههههههههههههههه ياسمين بيني وبينك قهرني وجد حسيتها دغ ب لغ ^^

ياسمينو هسا الحكي بال (آل و ألنا ووووووووووالخ ) يعتبر تطور؟!! طيب على أي اساس ؟!!! هل اللهجة البدوية تظهر الشخص بشكل غير لائق ؟! هل اللهجة الاردنية متخلفة ؟!!

عارفة انه مش هيك قصدك لكن هو قصد اللي بستحي من لهجته واللي حكى بكل اللهجات حتى ضيع لهجته الاصلية

ان تكون لبق لايعني انك تغير لهجتك ................ اشكرك غاليتي ^^

مش توصل لآل و ألنا انت التانية مش لهالدرجة

ههههههههههههههههههههههههههههه

بس اشي ومنه هلأ انت بتحكي مع واحد مصري او سوري او او صعب يفهم لهجتنا متل ما هي يعني تخيلي احكي لاميرة

قوكي و شلونكي و شلون عيالكي ولويه ما جيتي تلانا ودنا نشوفكي يا غبصة

هههههههههههههههههههههههههههههههههه

» العصفور الدي ابكى الملايين
» العصفور الدي ابكى الملايين
» الدعاء الذي ابكى الملايين بصوت خالد السعيدي
» هل تعرف دينك؟ سؤال وجواب
» الجوء الرابع : هل تعرف دينك سؤال وجواب ؟؟؟؟؟؟