الطير لا من ضاق من عشه يطير

يارشيد رح قله ترى ثامر بخير
عقبك وبأحسن حال هالحين حاله

طابت جروحه ولا بقى داخله غير
شيٍ يتل القلب كل ماطراله

وكانه طلب منك عن الشي تفسير
جاوب سؤاله لا تحاقر سؤاله

قله سمعت بيوم عن ضيقة الطير
وعن عشه اللي كان مرقد عياله

الطير لامن ضاق من عشه يطير
خان الغصن والعش دوّر بداله

وكانه فهم بتشوف فيه التعابير
لا غيرت وجهه سرح عنك باله

خله وروح لوضعه الحين تقدير
ماودي يبكي وانت واقف قباله

يارشيد لو إنه بدا منه تقصير
يبقى له بقلبي مكانٍ لحاله

صحيح إنا عقبه وأنا أخوك في خير
لكن إليا من ضاق جعلي فداله

قصيدة معبرة جدا ورائعة

تسلمي