امبارح كنت سهران مع صحابي عند محل قهوة (اصنص ) وكم شب بعرفش اسمائهم بس بسلم عليهم امباوسه المهم قعدنا على الرصيف المقابل لمحل القهوة وكل واحد معو كاسه القهوة تبعتو وكالعاده اخدنا التدرج الموحد بالكلام من مواضيع
الدراسه لانواع السيارات للبلوتوث مررنا كالعاده بقصص البنات الي ابنختم فيها قعدتنا دائما مع العلم انها ابتاخد نصيب ال Boss من القعده سولفنا اكتير كان معنا شب مش متاكد من اسمو لكن كان قاعد على الارض قام ووقف قدامنا واعطيناه الاهتمام
بما انه بدو يحكيلنا قصه المغامرة اعطا كاسة القهوة تبعتو لشب ثاني على بين ما يرفع بنطلونو الجينز الساحل ورفع نظاراتو الطبيه فوق شعرو الواقف بالجل وطلب سيجارة شحده من الشباب وطبعا السيجارة بدها ولعه وبعد ما طلب الولعه واستقرت الامورمعو صار هو واقف قدامنا وبلش يسولف
مع حركات تعبيريه بالايدين قال يا شباب قبل كم يوم اتصل فيه صاحبنا نزار النمس قال شو يا شباب املزقه فيه بنت ومش عارف يخلص منها ودور على سمعتها وعلى امورها لقاها البنت ما عليها حكي فما في اي حجه عشان يخلص منها فطلب مني اخد رقمها واتحركش فيها وازبطها
وفعلا اخدت الرقم وبشلت ابعتلها مسجات وارن عليها وانتو عارفيني يا شباب انا ازعر بهاي الدواوين (ومازال الكلام موجه لنا احنا القاعدين على الرصيف )والمهم البنت بعد محاوله شهر اخيرا اقدرت احكي معها تلفون وشرفي يا شباب البنت عنجد مؤدبه جدا ما عليها حكي وحاولت استدرجها بالكلام وكنت اسجل مكالماتها وما اقدرت امسك عليها ممسك محرز عشان اعطيه لنزار انو يكون حجه انو يطلعها خاينه المهم قد ما قززت البنت مكالمات راحت البنت عشان تخلص مني راحت اعطتني موعد وهمي بالمول بس كان مجرد كلام عشان تخلص مني واصلا هي ما
اجت على الموعد محسوبكم طبعا كان امسجل المكالمه وبسرعه البرق رحت اعطيت التسجيل لنزار اول ما سمع التسجيل قلي يا ازعر هاي الخدمه مارح انسالك اياها وعلى طول رن عليها نزار وحكالها ياخاينه يا قليله الحيا يا ..... يا...... بتخونيني مع صاحبي وانا كنت ناوي اخطبك بس فعلا انتي ما ابتستاهلي اتكوني ام اولادي وسكر السماعه ...وطبعا كل الشباب الي قاعدين على الرصيف فحمو من الضحك والمسخرة وهمه بوجهو لشب صاحب القصه سيل من الكلام المشجع مثل يلعن حريشك شو ازعر .. عنجد انك زلمه .. والله انك كبييييير .بعد هالقصه الغريبه قمت انا وبعدت شوي عنهم ووقفت عن بعد كم متر واطلعت عليهم وسئلت حالي سؤال ايهمااصح نحكي كلمه مسكين للبنت ولا للشباب هدول
موضوع: طريقة للتخلص من بنت ملزقه فيك 
16/11/2010, 08:46
