كرت غوار

قل هيه يا صمت الحبر ويش ما صار
إياك ثم إياك درب المذلة

جتك المزون وهلت الغيث مدرار
ابشر بغله ما هي بأي غله

دام القصايد تجمع اصغار واكبار
اعطف على الورعان والعود جله

أنحر لهم بنت النضا ست الابكار
قلط لهمم من صافي الكيف دله

لبيه ياام القوافي والافكار
صدر وعجز وإحساس محدن ولصه

شاعرك هادي وان حكى ثور إعصار
يجمع جنون الكون دقه وجله
فارس ما يشقوله اغبار
الخيل له والسيف له يوم سله

والليل له والبر له والبحرغار
من بره وصار البحر تابعن له

والجو له له ما وطى منه أو طار
حتى هقيت الكون له صار كله

هذا أنا وصفي وبالوصف بيطار
استغفر الغفار عن كل زله
بنيت لي فوق السحب قصر دوار
طوبه ذهب وقبابه الدر فله
واليوم ينشدنيي عن الحال اغرار
وينك عن الساحة فقدناك ولله

الشعر وده هالزمن كرت غوار
كلي فخر هذا الدرب ما أدله

حاجات من خلف الكواليس تندار
احدن رقى واحدن جلس في محله

والشاعر المبدع كوى الجرح بالنار
وأزرى يداوي علةٍ عقب عله

يوم الظما بالقور مع جوه الحار
لو يشرب النهرين ما فش غله

كلمات غريبة بس معبرة وتسلم يا خالد

يسلم عمرك اشكرك