كله تمام

سيادة الرئيس
كله تمام
لجل ما يرتاح قلبك علينا
وتعرف تنام
لجل ما يروح المرض العضال
ويضيع الزكام
كله تمام
ياوكلنا
أسف ياموكلنا
عيش فى سلام
المهم صحة سيادتك
وراحة المدام


أنت عارف أنا أبقى مين؟؟
أنا مش أبنك
وألا أبقى أخوك
ولا وزير ف تكية ابوك

أنا بعيد عنك راجل شريف
الصبح بدرى بلبس نضيف
وألحق مكان على الرصيف
وف الطابور
لجل ما احصل كام رغيف
م العيش المدعم
للولية وللعيال
ولو ف يوم نمت حبة
قول يساتر ويالطيف
ده الرغيف المش مدعم
تمنه ريال
قولى ياريس
حشترى عيش ف اليوم بكام
وأرجع وأقولك
كله تمام
ياريس
كله تمام
أكمل ياريس؟؟
حاااضر حكمل
وأحط عيشى جوه كيس
وبسرعة أجرى عل الأتوبيس
لجل ما أركب بالسلامة
وجوه منه تشوف العجب
تقول ياريس يوم القيامة
يادى الندامة
على شعب هده الزمن
والغالى فيه ملوش تمن
قولى ياريس
هو النفر عندكم
بيسوا كام؟؟
وأرجع وأقولك
كله تمام
فخامة الرئيس
كله تمام
وف المجمع
ألاقى واحد
ماشى مأمع
ما تقولش بيه
يوطى عليك
شوف لى فى جيبك كام جنيه
يحرق أبو اللى اخترع الفلوس
ده المرتب
ما يقضيش تمن الدروس
يوم خمسه منه بينتهى
وبقية الشهر الواحد يلوص
على حد تانى يسلفه
وتستنى الشهر الجديد
والشهر التانى
لسه بعيد
ويعينى لو جانا عيد
حتبيع الصفيح
وتكمل حياتك
على الحديد


كفاية ياريس؟؟؟
كده كفاية
وبوعدك
لسه بكره
حكمل معاك
كل ليلة قبل ما أنام
سلملى على علاء
والباشا جمال
وعلى المدام
وبوعدك
بكره لسه فى كلام
وحطمنك
وراح أقولك
كله تمام ياريسى
كله تمام

يابلدنا ياعزيزة فيكى حاجة محيرانى
نزرع القمح ف سنين .. تطرح الكوسة ف ثوان

موضوع في قمة الخيااال
طرحت فابدعت
دمت ودام عطائك
ودائما بأنتظار جديدك الشيق
لك خالص حبي وأشواقي
سلمت اناملك الذهبيه على ماخطته لنا
اعذب التحايا لك

هههههههههههههههههه عجبني الكلام قوي