هذا المقال كتبته قبل الثوره بأيام قليله..وكان من المفروض أن يتم نشره في عدد إحنا لشهر فبراير (ده لو كان فات من الرقابه ساعتها)..ودلوقتي لما قرأته، قررت إني أنشره...عشان فيه أجزاء منه حسستني قد إيه الكام شهر اللي فاتوا فرقوا في حياتنا كأنهم عشرات السنين
الشعب المصري بشكل عام من اكثر الشعوب إيماناً بنظريه المؤامره..
مافيش حاجه إسمها صدفه، أو قضاء وقدر، او كارثه طبيعيه...مافيش كلام من ده.
كل حاجه بتحصل لازم يبقى وراها مؤامره...أو خفافيش الظلام، أو أيادي خفيه تعبث (طبعاً إحنا عارفين كلنا هي بتعبث فين بالضبط...في الظلام طبعاً..لأ، مخك مايروحش لبعيد لو سمحت).
أو طبعاً الإحتمال الأكبر وهي ان الكوارث دي كلها وراها مخطط صهيوني ، أو مخطط أمريكي صهيوني، أومخطط أفريقي صهيوني برضه...أو مكيده من أعداء الوطن (اللي همُّ طبعاً الصهاينه )...او الإحتمال الأكثر واقعيه وتعقلاً من كل ذلك، وهو ان كل المصايب اللي بتحط على دماغنا هي في حقيقه الأمر ليست مخطط صهيوني، وإنما مخطط إسرائيلي (اللي هوّ بقى غير الصهيوني خالص).
والله الجماعه الصهاينه دول تاعبين نفسهم قوي معانا...ده انا كده لما بتخيل حياة الصهيوني من دول، من اول ما يتولد في مستشفى القصر الصهيوني الفرنساوي، بعدين يدخل مدرسه الأورمان الصهيونيه بنين، وبعدين يخلص صهيونيه عامه ويدخل جامعه...وهوًّ كل ده بيخطط ويدبر مقالب ومكائد تطلع من نافوخ حضرتي وأنا قاعد هنا في مصر...
دي عالم فاضيه يا جدع...
همُّ الناس دول إيه؟...متفرغين؟؟...ماحدش فيهم مصاحب مثلاً؟؟...او عنده أي هوايات تانيه؟؟...مافيش هناك سايبر كافيه يوحد ربنا، أو محل PlayStation يضيعوا فيه وقتهم؟
يعني الجراد يغطي سماء القاهره عشان الحكومه إستخسرت رشتين بيرسول، نقول ده مخطط صهيوني لضرب الزراعه في مصر، القرش بتاع شرم الشيخ ياكله كام سايح، برضه مخطط صهيوني بس لضرب السياحه، هيفاء وهبي تلبس البنطلون الأحمر وترقص رقصتين، يبقى اكيد برضه مخطط لضرب شباب هذا البلد الآمن، اللي فتّحوا عنيه على صنف نسوان فيه أوبشنز ماكانش يعرف إنها بتنزل اساساً.
وعلى المستوى المحلي بقى، كل حاجه مؤامره برضه، بس من الحكومه هذه المره.
الحشيش ينتشر في البلد، يبقى الحكومه هيّ اللي سايباه ينتشر عشان عايزين الشباب يفضل مغيب. الحكومه تمسك بتوع الحشيش، تبقى مؤامره من الحكومه عشان تِقِل مزاج الشعب.
الجو شديد الحراره، عشان في حد من الحكومه بيبيع تكييفات وعايز يمشّي البيزنس بتاعه..الجو يبقى شديد البروده يبقى أكيد فيه واحد في الحكومه أتقل من بتاع المكيفات دخل في بيزنس الدفايات.
الحكومه بتحارب الإخوان خوفاً من إنهيار بيزنس أمواس الحلاقه في مصر، وبتحارب العلمانيين خوفاً من إنهيار بيزنس السِبح، وبتحارب تامر حسني خوفاً من إختباء خلايا إرهابيه في شعر صدره، إنما سايبين مرتضى منصور تشجيعاً لصناعه السي ديهات في البلد.
مع إن إفتراض وجود مؤامره حكوميه على الشعب المصري أساساً، إفتراض خاطئ، لسبب بسيط جداً...وهوّ إنك ليه محتاج تتآمر على حد عمره ماعمل ولا هايعملك حاجه؟
يعني لو انا ماسك واحد ومعلقه في شجره ورابطه من رجليه، ليه محتاج إني اخطط وأدبر مؤامرات عشان أديله على قفاه؟...ما أديله على قفاه على طول من غير وجع دماغ.
المرتبات قليله...وهوًّ كده...إذا كان عاجبك يعني... الحاحه غاليه..آه غاليه...أعملك إيه يعني؟...الإنتخابات مزوّره؟...يا سلام؟!!...الأهلي كل مايجيبوله حكم مصري يكسب، وكل مايجيبوله حكم أجنبي يخسر أو يتعادل...لأ دي صدفه..وبعدين انت هتتكلم في سياسات عليا ولا إيه؟
طاب بدل إحنا شاطرين في نظريه المؤامره كده...ليه عمرنا ما فكرنا في المؤامرات دي بالعكس؟
يعني ليه عمرنا ما قولنا إن الزحمه الرهيبه والشوارع اللي واقفه مابتتحركش دي، مخطط حكومي لإعطاء فرصه للشعب إنه يتعارف ويتآخى بكل طبقاته في قلب الشارع المصري من أول اللي راكب ميكروباص لـ اللي راكب مرسيدس ؟
ليه ما إعتبرناش زحمه الأوتوبيس والمترو فرصه لـ"تلاحم" الشعب؟
ليه ما إفترضناش إن التحرش اللي بيحصل في الشارع على مرأى ومسمع وأحياناً بمشاركة أفراد الأمن، منفذ لتفريغ الكبت الناتج عن تأخر سن الزواج في مصر. (مش احسن ما يتجهوا إلى فتيات الليل والعاهرات ولا قدر الله ينحرفوا؟)
ليه ماقولناش إن عدم توّفر رعايه صحيه جيده للعامه، هي فرصه للتقرب إلى الله، لأنه من المعروف إن المؤمن مصاب، وإن الإيمان الحقيقي مابيبانش إلا في الشدائد؟
ليه ما أحسّناش الظن وفكرنا إن عدم توفر وظائف والبطاله المنتشره بين الشباب ما هو إلا مخطط، لترسيخ فكره الإكتفاء الذاتي والإعتماد على النفس عند المواطن؟
الفقر ما هو إلا فرصه لأهل الخير، والجهل فرصه لطلب العلم في الصين، والسرقه فرصه للتوبه وتحويل السيئات الى حسنات، والفتنه الطائفيه فرصه لتغيير البروفايل بيكتشر بتاعتك على فيس بوك.
بس تعرف بجد إيه اللي يضايق بعد كل ده؟..
إللي يضايق بجد، إن أكتر حاجه زعلتك في مقالي ده هوُّ إن انا قٌلت إن الأهلي بيكسب بالحكّام.
ربِ إرحم هذا البلد من الجهل، والفقر والتعصب والتفاهه.
حكمه اليوم:
قال يا صهيون إيه إللي صهينك؟..قال مالاقيتش حد يلمني.
خدعوك فقالوا:
سيب الحكومه، تحبك...حب الحكومه، تسيبك. (وربنا أعلم باللي في نيّتي)
الدرس المستفاد:
لكل من سوّلت له نفسه أن يعبث بهذا الوطن، إحذر، فإن الله يراك، ومرتضى منصور عنده سي ديهايه.
مصطفى حلمي
ازهار القدس
موضوع: رد: نظريه المؤامرة 9/4/2011, 22:52
مشكورة انثى كل شي قدر من الله والشعب المصري يسخر من كل شيء حتى الزلزال
Jasmine collar
موضوع: رد: نظريه المؤامرة 10/4/2011, 00:06
هو قصده انه نحنا كمان علينا حق مش كل شي بيصير معنا هو مؤامرات صارت هاي الشغلة شماعة بنعلق عليها اخطاءنا
مثنى سيف
موضوع: رد: نظريه المؤامرة 10/4/2011, 03:15
تقبل مروري و خالص تحياتي
theredrose
موضوع: رد: نظريه المؤامرة 10/4/2011, 03:21
وبمصر ما رح تهدى الامور لانه الفساد الي فيها مش عادي ومش طبيعي
موضوع: نظريه المؤامرة 
9/4/2011, 22:50
