أقرأ الموضوع واعطي عنوان من عندك

أنا لا أملك طريقه بترتيب الكلمات على شكل شعر أو خاطره جميله..
أنا لا أملك تلك المواهب الرائعه بإيصال الشعور والأحاسيس بكلمات حساسه..

الذي أملكه فقط.. احساس صادق من القلب الحزين..
كلمات تخرج من أعماق ذلك القلب الدامي..
كلمات فيها حراره الجرح وحزن السنين..

يسألونني..
لماذا كل هذا الحزن في عينيك...؟؟
لماذا همك يسيطر عليك...؟؟
ثم يذهبون..
حتى أنهم لا ينتظرون الإجابه..
لا أعلم .. ان كانوا مشغولون قليلا وسيعودون بوقت آخر..
أم أنهم تعودوا على هذه الأسئله.. مثل أسئله كثيره تعودنا عليها..
حتى من غير أن نحترمها.. ( كيف حالك؟ كيف صحتك؟ )
أسئلة كثيره فقط ننطقها .. ولا ننتظر الاجابه دوما..

كل هذه مقدمه لحوار بين شخص وقلبه...

الشخص: ليش حزين؟
القلب: لما تشوفني سعيد أسألني ليش سعيد أما الحزن ما رح يفارقني لحظه..
الشخص: أف أف أف .. ليش كل هالحزن..؟؟
القلب: وليش هالسؤال يعني؟؟ من متى حدا بيسألني عن حزني وهمومي؟؟
الشخص: كتير غيرك حزين ومهموم.. وكل واحد عنده جروحه وهمومه..
القلب: بس أنا كتير سمعت للناس وشاركتهم أحزانهم..
ليش أنا ماحدا سألني وشاركني؟؟
ليش لما ألاقي انسان مهموم بعمل المستحيل لأخفف عنه؟؟
الشخص: صدقني بدهم يساعدوك بس أنت أعطيهم فرصه..
القلب: هههه..
الشخص: ليش ضحكت؟؟
القلب: أكتر شي أعطيته الفرص.. بس شكله فرصي بالوقت الضائع..
ولك أنا محتاج لأنسان يحس فيني..مو يسأل هالسؤال وخلص..
على أساس بده يساعدك..
ولكل صرنا بزمن بيخوف،كل واحد أهم شي مصلحته وبس..
ما عاد حدا يحس بالتاني الا من رحم ربي..
الشخص: طيب أنت جربت تعطي فرصه لحدا؟؟؟
القلب: أسمع شو بدي أحكيلك..
أنا كل ما ألاقي انسان وأحس بالراحه معه بتفائل وبحكي خلص..
رح لاقي الأنسان الي يعوضني كل شي خسرته بحياتي..
الشخص: طيب ممكن سؤال ؟
القلب: أتفضل..
الشخص: أنت شو خسرت؟
القلب: كتير والله .. أصحابي .. ماتوا.. وتركوني وحيد بهالدنيا..
كانوا كل شي بحياتي.. كنت لاقيهم لما مخنوق ومتضايق..
كنت لاقيهم لما كون فرحان كتير ومبسوط..
الشخص: الله يرحمهم.. طيب بس مو نهايه العالم..
القلب: بعرف وهاي المصيبه.. وين البديل؟
والله تعبت وأنا أدور..
الشخص: صدقني رح تلاقي..
القلب: وأزيدك من الشعر بيت..
قلت يا ولد أتزوج بتتغير حياتك وبتعيش مرتاح ومبسوط..
الشخص: طيب كويس..
القلب: ولما الله رزقني بطفله كانت الدنيا مو واسعه سعادتي.. بس..
الشخص: بس .. كمل..
القلب: ما تتخيل أديش جهزتلها وأشتريت ألعاب وملابس ..
بس ما لبست منهم الا شي واحد.. الكفن..
الشخص: الله يعوضك..
القلب: الحمد لله.. بس بترجاك ماتحكيلي ليش حزين..
الشخص: خلص حبيبي ولا يهمك بشوفك السنه الجايه على خير..


انتهى الموضوع بدون نهايه لأنه مش عارف البدايه..

[ندعوك للتسجيل في المنتدى أو التعريف بنفسك لمعاينة هذه الصورة]

غربة القلب والنفس
هذا العنوان اللي خطر على بالي
مشكورة لارا موضوع جميل وكلمات معبرة

عنوان حلو امجد انا قبلت بالعنوان جد معبر ومناسب وشكرا لمرورك

الصراحة موضوع رائع جدا بس للاسف مو عارف احطلو عنوان معك حق انك حطيتي بدون عنوان محدد شكرا كتيييييييير

همسات قلب حزين

شكرا لمروركم

[ندعوك للتسجيل في المنتدى أو التعريف بنفسك لمعاينة هذه الصورة]

عندما يحزن القلب
[ندعوك للتسجيل في المنتدى أو التعريف بنفسك لمعاينة هذه الصورة]