حكينا الجزء الماضي عن مكونات الميكاترونيكس وطريقة التحضير قصدي ترابط الهندسات اللي بتكونها
رح احكي بهاد الجزء عن استخدامات ميكاترونيكسية في حياتنا
على سبيل المثال لو فرضنا انو عنا بيت ساكنين فيه وبدنا نخلي البيت هاد مثالي ...
شو يعني بيت مثالي ؟
هوو هووو انتا من الجزء الماضي ملزّق فيي
ياخي بسأل بس
طيب اسأل بس تقززنيش
البيت المثالي باللغة الميكاترونيكسية هو اللي بكون كل اشي فيه محكوم بأوامر حاسوبية ... يعني الاثاث والاجهزة الكهربائية بنقدر نتحكم فيهم اوتوماتيكياً
خلينا نوخذ حياة لأحد الاشخاص بعيش ببيت مثالي ...
الصبح وقت ما بدو يصحى بكون جهاز مربوط بعقله بأمر الحلم انو يعمل توقّف مشان يكمله بعدين ( اذا كان الحلم حلو ) وجهاز مربوط على السرير يطلع منو ايد وتصير الايد تهزّ في الشخص وتحكيلو بصوت حنون " قوم اصحى " وتمسكو بحنية وتوقفو على اجريه وتيجي كرسي متحركة توخدو على المطبخ .. وبمجرد الدخول للمطبخ ماكنة قهوة تجهز قهوة بشكل سريع وتقدمله اياها وتشربه اياها كمان ويروح على غرفة لتغيير اواعييه وجهاز كامل يغيرلو اواعيه وكل اشي بالبيت يكون بخدمته وبس بدو يطلع على الشغل يفوت بآلة الزمن وينتقل من البيت للشغل بشكل لحظي وبدون مواصلات وبالشغل في جهاز بيشتغل كل شغله وهو بس قاعد وبروح بنفس آلة الزمن وبرجع ينام ويكمل الحلم
لأ هاي مش ميكاترونيكس هاي اسمها احلام اليقظة
طب خلصنا خلصنا بلا زناخة كمل سواليفك ورانا اشغال
طيب
خلونا نبلّش بالشخص نفسو اللي عايش بالبيت المثالي من البداية ...
في ناس بتصحى بسرعة من اي حركة او صوت بسيط ... وفي ناس مثل حالتي بدي قنابل تتفجر تحت راسي مشان اصحى
في ناس ما بتصحى على الصوت ولازم اشي يحركهم مشان يصحو ...
شو الحل ؟؟؟!!! بسيطة بسيطة الميكاترونيكس موجودة
ساعة المنبه شو مبدأ عملها ؟؟؟ بسيط وغبي .. انو لما تصير الساعة مثلاً 7 ترن ... طيب لما تصير الساعة 7 كيف بترن ؟؟ في "تيّار كهربا بيشغل الجرس" طيب طالما هاللتيار بشغّل جرس فأكيد بنقدر نخليه يشغل اي اشي : ضو .. مروحة ... تلفزيون ... اي اشي كهربائي ...
طيب خلينا نوخذ السرير اللي بنام عليه هاللشخص ونقلبو ونركب اشي على رجليه ...
شو نركب على اجريه ؟؟؟ نلبّسو بوت مثلاً
لا حول ولا قوة الا بالله يزم حل عني خليني اعرف اكمل هالبوست
هسه كلنا بنعرف انو لما تبنشر السيارة وبدنا نغير العجل لازم نستخدم ( الجك ) مشان نرفع السيارة ...
الجك هاد في منو زيت وفي منو هوا .. بس في الميكاترونيكس في جكات بنستخدمها وبتكون "متحكم بها " وبنسميها هيدروليكية ورئويه ... وبتشتغل هوا وزيت واشياء اخرى ...
طيب نرجع للسرير ... لو ركبنا على كل اجر للسرير جك مشان يرفع وينزل الاجر !!!
وش ذا ؟؟ :سمايلي خليجي بتسائل:
تخيلو السرير اللي الو اربع اجرين بطلع وبنزل ... بس مش بانتظام
يعني الاجرتين اليمين بطلعو والاجرتين اليسار بضلوا زي ما همه ... بعدين الاجرتين اليسار بطلعو والاجرتين اليمين بضلو زي ما همه رح تصير سيسو
او لو خلينا كل اجر تطلع وتنزل لحالها ... رح يصير السرير عبارة عن مولينيكس
تخيل عزيزي المستمع ساعة المنبه تبطل ترن وتصير عبارة عن آلة لتكسير البشر اللي بصحوش بسرعة
مين هاد اللي مش رح يصحى على دوامه الصبح
صحي الزلمة المسكين وبدو يروح يشرب قهوة
لسة بدو يقعد يستنى ماكينة القهوة لحتى تسخن مي وتعمل قهوة بدنا اشي عملي وسريع ومرييح
ساعة المنبه نفسها ... نفس التيار الكهربائي اللي بشغل مولينيكس السرير بنخليه يشغل ماكينة القهوة وعبيل ما يصحى ويلملم جسمو المكسر من السرير ويوصل المطبخ بتكون كاسة القهوة بتستنى فيه
طيب فرضاً فرضاً حكّو بطنو وجاع وصار بدو يتزهرم يوكل
متى بدي اخلص من هالمصيبة هاي
طيب بدو يوكل ويقلي بيضتين مثلا وهو بعرفش يقلي بيض شو يعمل ؟؟؟؟
بسيطة
يدرس ميكاترونيكس
لو جينا قلاية البيض وركبناها على غاز الكهربا ( هاد اللي بكون يشتغل على الكهربا وفي عليه زي سلك ملفوف وبس نشغلو بصير احمر من السخونة )
المهم بنفك سيارة ولد صغير هدول اللي بكونو يشتغلوا لا سلكي وبنوخد منها الماتور اللي عند العجال وبنرمي السيارة مشان الولد ما يكتشف انو مخربينلو السيارة
بنركب الماتور فوق القلاية وبنحط عليه اي اشي ممكن يحرك البيض ...
بنقدر نستخدم تايمر ( Timer ) لحتى يفصل الكهربا عن الماتور بعد 30 ثانية مثلاً ( لأنو بكفي لخ بالبيض ) ويفصل الكهربا عن الغاز بعد 40 ثانية مثلاً ( بلاش ينحرق البيض )
بس يعني الله بعينو بدو يحط البيض بصحن ... يعني بدنا نغلبو معنا الله بعينو يتحملنا شوي
انا تعبت وانا بكتب بنكمل بالجزء القادم كيف نخلي البواب تفتح لحالها وتسكر لحالها ورح نحكي عن استخدام الميكاترونيكس في السيارات وكيف نخلي القيادة اكثر اماناً باستخدام الميكاترونيكس
__________________
منقوول
موضوع: الميكاترونيكس 2 
20/11/2010, 07:39
