mr lonely
 |  موضوع: الميكاترونيكس 1  20/11/2010, 07:36 | |
| ما بدي ابدا بداية تقليدية واقعد اضيع وقت واحكي شو هي هندسة الميكاترونيكس لأنو وين ما لفينا ورحنا فالكل رح يحكي هي خليط بين هندسة الكهربا وهندسة الميكانيك وهندسة نظم التحكم الالكترونية وهندسة الحاسوب.... بس انا بدي اوضح توضيح سريع انو كيف انربطت هالهندسات مع بعض بأمثلة سهلة وبسيطة بعدها رح نبدأ بسوق العمل وشو اهم الاشياء اللي ممكن يطبقها مهندس الميكاترونيكس ( الاردني )
الشرح رح يكون بالاستعانة بالصورة اللي بتوضح طبيعة الميكاترونيكس :
[ندعوك للتسجيل في المنتدى أو التعريف بنفسك لمعاينة هذه الصورة]
واضح بالصورة انو الميكاترونيكس بتتكون من اربع هندسات رئيسية بيتفرّع منها اربع نظم تحكم ....
شو يعني نظم تحكم
يعني انو كيف نربط بين هندسة معينة وهندسة ثانية ملهاش دخل فيها
برظو ما فهمتش
يعني لو حكولك اعطيني وجه الشبه بين واحد ميكانيكي وواحد كمبيوترجي بتقدر تعطيني ؟
لأ
طب انطم وخليني اكمل
بالنسبة للصورة ...الهندسة الكهربائية اللي باللون الاخضر هي الطاغية على هندسة الميكاترونيكس لأهميتها الشديدة فيه ... والهندسة الميكانيكية هي ثاني اهم فرع للميكاترونيكس ...
طيب لما ندمجهم مع بعض شو بصير ؟؟
خليني اعطي مثال ... المروحة اللي بتكون معلقة بالسقف لو فرضنا انها دائماً شغالة صيف وشتا ,,, او لو فرضنا انها دائماً شغالة على سرعة بطيئة ,,, طب صارت الدنيا شوب كيف بدنا نزيد السرعة ؟؟ نترجاها مثلاً
مشان هيك انوجد اشي اسمو المفتاح اللي بتحكم بسرعة المروحة ...
طيب المروحة عبارة عن ماتور ... يعني ميكانيك ...
والمفتاح عبارة عن سلاك كهربا ملفوفة على بعض ( محوّل ) يعني كهربا ...
هون بنلاحظ انو الميكانيك لحالو ما الو فايدة والكهربا لحالها ما الها فايدة
تحيا الميكاترونيكس حلالة المشاكل
بس مش بهاللسهولة اللي متصورينها ... يعني الميكاترونيكس مش بس عبارة عن مراوح سقف
اغلب انظمتها على ماتورات بتشتغل على قدرات عالية ... يعني بالمصانع والاشياء هاي اللي بدها اشي كبير ...
نيجي لهندسة الالكترونيات واللي هي باللون الاحمر ... الميكاترونيكس بتربط بين الكهربا والالكترونيات عن طريق الـ process control واللي معناها التحكم بالعمليات...
شو يعني التحكم بالعمليات
هييي هييييي علينا ياخي خليني اكمل شرح واذا ما فهمتش بعديها احكيلي
طيب
طالما انو غالبية المواسرجية نصابين بهالبلد (باستثناء مواسرجي ازعر بلاش اتبند) بخربوا العوامة مشان يردو يرجعو بعد فترة ويصلحوها ويوخدو مصاري ...
يااااع عوامة قديمة كثير فش اشي احدث من هيك
امبلى في الميكاترونيكس
التحكم بالعمليات هاي بتخلي المبرمج ( اللي هو صاحب خزان المي ) يتحكم بمستوى المي بالخزان بدون استخدام عوامة
كيف يعني ؟؟ بتعامل مع الجن ؟؟؟
انطم واسمع
في اجهزة الكترونية اسمهم (حساسات ) sensors وهدول بنسخدمهم بدل الحواس الخمسة ... يعني :
لما بدنا نشغل الضو بنكبس على كبسة ... نفس الكبسة بتشغلو ونفس الكبسة بتطفي
هون استخدمنا حاستين ( البصر ) بانو شفنا الدنيا عتمة ( واللمس ) بانو كبسنا على الكبسة ... وهالحاستين بنقدر نستغني عنهم ب(حساس) واحد فقط وهو light sensor ... المجس الضوئي ...
يعني بنحط هالسنسور بمكان وبنشبكو بدارة كهربائية خاصة فيه .... ولما الدنيا تصير عتمة لحالو بكتشف العتمة وبرسل امر بتشغيل الدارة الخاصة فيه وهي بتقوم بتشغيل الضو تلقائياً ....
او مثلا لما نشم ريحة بالمطبخ عاللسريع بنفتح الشباك او بنشغل مروحة الشفط ... في سنسور خاص بيكتشف الروائح وبيشغل مروحة الشفط لحالو وممكن انو نجهز الشبابيك لحتى تفتح بشكل آلي كمان
الامثلة لا نهائية وبتشمل كل امور الحياة ... بس شو دخل العوامة بالموضوع ؟؟؟
نظام التحكم بالعمليات شامل جداً وواسع وصعب انو نذكر كل اشي بيقدر يعملو والمشاكل اللي بقدر يحلها ...
بس لو نتخيل انو استخدمنا السنسور في خزان المي ....
الخزان فاضي ... السنسور اكتشف هالاشي ... ارسل اوامر للدارة الكهربائية بانها تشغل ماتور ضخ المي ... اشتغل الماتور والخزان بلّش يعبي .... تعبا الخزان والسنسور اكتشف هالاشي ... بيرسل اوامر بانو يتوقف ضخ المي للخزان ....
يعني بكفيش انو استغنينا عن العوامة والمواسرجية النصابين .. لأ كمان استغنينا عن غلبة ضخ المي وصار كل اشي توماتيكي
طيب شو بعرف السنسور لوين انا بدي اعبي الخزان ... بلكي بدي اعبي نصو بس ؟
الحل سهل وموجود بالجزء الثالث واللي هو اللون النهدي هندسة الكمبيوتر
هندسة الكمبيوتر مرتبطة بهندسة الالكترونيات بنظام اسمو ( حاكمات المنطق المبرمجة ) او كما يسميها الغرب ( Robotics )
شو يعني حاكمات المنطق المبرمجة ..
اشياء غير محصورة بذكرها لأنو كل نوع منها بتفرع لآلاف الانواع ...
بديش احكي كثير عنها هسه لأنو رح احكي عنها بأجزاء قادمة بشكل مفصل وشو استخداماتها وشو الشغل فيها بسوق العمل ...
بس الفكرة اللي بدي اوصلها انو بنستخدم الكمبيوتر بكتابة برنامج معين ( على السي بلس او الجافا او الماتلاب او اللاب فيو ) او كثير برامج غير .... البرمجة هاي بتفهمها الالة ( الدارة الكهربائية اللي فيها السنسور مثلاً ) وبتطبقها لحتى تعمل الاشي اللي احنا بدنا اياه بناءً على ارقام معينة ...
مثلا لو بدنا نشغل المضخة تبعت المي اذا بوصل مستوى المي في الخزان لمستوى 20% ويطفي لما يوصل 75% ... بنكتب برنامج بأوامر خاصة وبنترك الميكاترونيكس تعمل بهدووووء
الجزء الرابع وهو ربط الحاسوب بالميكانيك ... ما بيختلف كتير عن التحكم بالعمليات اللي حكيت عنو بالنقطة اللي قبل بس في اختلافات جوهرية بسيطة بتأدي لنتائج اعظم....
هاد بالنسبة لترابط المكاترونيكس وامثلة بسيطة على كل فرع ...
والاجزاء الجاي رح نحكي عن سوق العمل .... شو بيعملو مهندسي الميكاترونيكس ... مين بيطلب مهندس الميكاترونيكس ... نقاط الضعف والقوة لدى مهندسي المياكترونيكس ... والاهم مشاريع ميكاترونيكسية يقوم بها المهندس ليخدم بها العالم ....
| |
|
KLIM
| | موضوع: رد: الميكاترونيكس 1 24/11/2010, 22:09 | |
| اكثر شي كهرباء و ميكانيك تخصصهم | |
|
mr lonely
| | موضوع: رد: الميكاترونيكس 1 9/12/2010, 04:08 | |
| اهلا وسهلا كلاام شكرا لمرورك | |
|
Jasmine collar
| | موضوع: رد: الميكاترونيكس 1 21/6/2011, 10:25 | |
| | |
|
