فتاوي مية .. مية !!!
كتبهاالدكتور محسن الصفار
فتاوي مية .. مية !!!
دخل الطبيب الى عيادته في المستشفى الخاص بالطوارئ وطلب من الممرضة أن تنادي على اول مريض وسألها عما هي حالته فأجابت:
- اول حالة يا افندم راجل واخد علقة سخنة من مراته!!
تعجب الطبيب مما يسمع وقال:
- قصدك واحدة ست ضاربها جوزها؟
- لا يا افندم زي ما قلت لحضرتك راجل واخد علقة من مراته وهو دلوقتي هنا ومراته محجوزة في قسم البوليس!!
- طيب خليه يدخل.
دخل المريض وكان رجلاً ضعيف البنية ويلبس نظارات مكسورة من احدى جهاتها وتبدو علامات الازرقاق تحت عينيه ويده مربوطة الى عنقه وكأنها مكسورة.
سأله الطبيب:
- مين اللي عمل فيك كده؟
- مراتي يا دكتور
- وحد الله يا راجل بقى مراتك عملت فيك كده؟
- أيوه يا دكتور.
- طب ازاي؟ فهمني.
- والله أنا كنت جاي من الشغل لقيت مراتي مش موجودة والعيال قالبين البيت فوقه تحته ولا فيه غدا ولا حاجة قعدت استنيت مراتي دخلت بعد نص ساعة قلتلها كنتي فين ؟وإيه الوضع الغريب ده في البيت؟
- ها وقالت لك إيه؟
- قالت لي ( والله أنا حرة ومالكش دعوا بيا ) قلتلها ماليش دعوا ازاي؟ انت مش مراتي برضه والا أنا دخلت في بيت الجيران بالغلط!!!
- كلام معقول وبعدين؟
- ولا قبلين!! قالت لي والله من النهارده وطلوع الوضع حيبقى كده واللي مش عاجبه يخبط راسه في الحيط!!
- سبحان الله.
- والله يا افندم هو كده بعدما قالت الكلام ده قلتلها مين ده اللي يخبط دماغه في الحيط يا قليلة الأدب؟ ده انتي اللي راسك لازمها تكسير علشان تتعلمي الأدب, وبعدها عينك ما تشوف الا النور يا دكتور لقيتها خالعة الجاكيت وعاملة زي بتوع أفلام الكاراتيه وراحت صارخة بصوت يخوف وناطة في الهوا يجي مترين وضارباني برجلها على راسي وبعد ماوقعت انا على الأرض حطت رجلها على صدري زي ما عساكر الأمريكان يعملوا مع العراقيين, وقالت لي: شوف أنا اتعلمت كاراتيه وبقى عندي حزام أسود وكمان بقى فيه فتوى إن الست من حقها تضرب الراجل دفاعاً عن النفس.
- هو انت ضربتها؟
- لا يا بيه هو أنا لحقت أعمل حاجة!!
- طب وقلتلها الكلام ده؟
- أيوه وهي ردت عليا: يا سلام يا خويا هو انا لسة حاستنى على ماتمد ايدك عليا؟ انا أتغدى بيك قبل ما تتعشى بيا واهو الشرع كمان بقى في صفي!!
- طيب عملت إيه بعدها؟
- ولا حاجة خدت العيال على بيت أهلي وصلت هناك لقيت أبويا في عربية الاسعاف ومدشدش!!
- خير حصل إيه؟
- ولا حاجة سلامتك، تخانق مع أمي راحت ضارباه علقة ماخدهاش حرامي في مولد واهو دلوقتي في العناية المركزة وأمي مع مراتي في القسم محبوسين!!
طار عقل الطبيب وقال:
- لا حول ولا قوة إلا بالله احنا طول عمرنا كنا نشوف ضحايا العنف الأسري من الستات ودلوقتي بقينا نشوف الضحايا من الرجالة!!!
- هي دي المساواة اللي بيتكلموا عنها!
- يعني بدل ما تيجي فتاوي تحرم ضرب الراجل لمراته ونعمل قوانين تمنع الكلام ده نقوم نصدر فتاوي إن الستات تضرب الرجالة!! ما نعمل البيوت حلبة مصارعة أحسن!!
- أعمل إيه أنا دلوقتي يا دكتور؟
- ولا حاجة حاعملك تقرير واحولك على النيابة وخلي المحاكم تشوف لكم حل انتو الاثنين.وانا اخلي بالي احسن الممرضة بتاعتي شكلها كدة بترفع اثقال !! ازود لها المعاش احسن ما اكل علقة انا الاخر واتبهدل !!!
وكل فتوى وانتم بخير.
موضوع: فتاوي مية .. مية !!! 
16/11/2010, 02:40
