ليش يحطون على أبواب المباني أجهزة تضخ الهوا تحت؟
يسمون هالشغلة باب هوا – Air Door او ستارة هوا – Air Curtain، تعزل الجو الداخلي للمبنى عن الجو الخارجي، تمنع دخول الحشرات، تمنع دخول الغبار، تحافظ على دفء\برودة الهوا الداخلي على حسب الموسم. يعني حتى إذا كان الباب مفتوح حق المبنى تقريبا ما راح يدش الهوا الخارجي على حسب قوة التيار. تخيل باب مجمع كل شوي يتبطل ويسكر يتبطل ويسكر … أكيد بيدش المجمع هوا حار بالصيف أو غبار ويطلع الهوا البارد الداخلي والناس تشتكي المجمع خربوطة.
الجهاز مجرد مروحة قوية لازم توصّل تيار هوا من أعلى الباب إلى الأرض. تسحب الهوا الداخلي وتضخه لي تحت مكان الباب أو أي فتحة خارجية. طبعاً كلما يكون الهوا الخارجي قوي راح تقل فعالية المضخة. واللي نشوفه غالباً ان الهوا يشتغل بس يوم ينفتح الباب عشان يوفر كهربا.
عملياً الأحسن انهم يضخون الهوا من تحت لي فوق، فعالية العزل راح تكون أكبر. بس طبعاً ما ينفع حق الناس والسالفة مو مقبوله اجتماعياً، تخيل اللي لابس دشداشة مرة وحده يصير كأنه باربية مغترة، وحتى مو عدل حق الحريم والمتحجبات. من جذي حق عمليات التصنيع والأجهزة يستخدمون الهوا من تحت لي فوق والعكس حق الناس.
موضوع: ليش يحطون على أبواب المباني أجهزة تضخ الهوا تحت؟ 
29/9/2010, 15:36
