--------------------------
كان عمري 17 سنة .. وكنت لسى ناجح على البكلوريا
وكانت فترة صيفية .. يعني العطلة الصيفية
وانا بالصيف كنت اشتغل بمحل ازياء نسائية
المهم .. كان في جنبنا محل ازياء كمان وكانت تشتغل فيه صبية
الله يذكرها بالخير ويسرلها أمرها وين ما كانت
كانت ظريفة كتير .. مهذبة ومحترمة واخلاق عالية وجمال
كنت دائما اشوفها بحكم انو نحنا جيران ..
بالأول ما كان في اختلاط كبير بيني وبينها .. يعني كنت احتك فيها بشكل سـطحي .. وشوية كلام مو اكتر
مع الأيام .. تعودت عليها .. صار كلامنا اكتر .. صرنا نقعد مع بعض نحكي احيانا بالشغل واحيانا بالدراسة واحيانا عن حياتها او حياتي .. احاديث كتير
وكل يوم كنت اشوفها احلى من يلي قبلو
حسيت انو فعلاً هالبنت .. قريبة مني
يعني طريقة تفكيرها ، كلامها ، حركاتها
لقيت فيها الشـي يلي كنت اتمناه
ويوم عن يوم حسـيت حالي فعلاً اني متعلق فيها .. وبلشت تعجبني .. يعني صار في نوع من الإعجاب المتبادل
لأنو هي كمان كانت احيانا تحكيلي عن حالي
انو شخص منيح ، محترم ، مهذب .. وهيك
كنت متردد اني اصارحها بمشـاعري .. واني من الممكن اكون بحبها .. وهي ما كانت تلمحلي بشي
لهيك كنت خايف .. كنت خايف اني اعترفلها بمشاعري .. واخسرها ..
بيوم من الأيام .. وللأسـف كانت نهاية العطلة قربت
وصلت متأخر كتير على المحل .. فتحت المحل زبطت كل الأمور
ولا بلاقيها واقفة على الباب ..
قلتلا اهلين .. ما ردت
انا استغربت .. قلت لحالي ولي شو القصة ؟
قلتلا شبك ؟ ما تردي
اطلعت على الارض .. وطلعت
انا فوراً لحقتها
دخلت لعندها على المحل وسئلتها شو في ؟
قالتلي ما بعرف .. بس انت ليش اتاخرت
قلتلا شو بيعرفني هيك صار
قالتلي هيك صار ؟ وانا من الصبح قاعدة على نار مفكرة انو صار معك شي
ما بعرف كيف هالكلام هاد دخل لقلبي السـعادة
يمكن كان من المفروض اتدايق او شي ما بعرف
بس وقتها حسيت اني مبسوط فعلا
يمكن لأنها كانت مهتمة فيني
وكانت هالكلمة هي .. بوابة لأني اتجرأ
دخلت وقعدت على كرسي قريب على الباب
قلتلا طيب يعني عيب عليكي
على القليلة فنجان قهوة او كاسة شاي
قالتلي روح ما بتستاهل
قلتلا اي طيب .. الله يسامحك
اجيت بدي اطلع قالتلي فوت بلا غلاظة
وفعلاً .. عملت قهوة .. وقعدنا نشرب
وكنت اتعدمت اني ما احكي شي .. بس ضلو عيوني عم يراقبو عيونها
وهي تتطلع فيني شوي وتبعد نظرها عني
كانها عم تحاول تخفي شي
هون قلت لنفسي .. طيب هي مشاعري وما عم اعمل شي غلط
شو المشكلة اذا كنت حبيتها ؟ وين الغلط اذا صارحتها بهالشي ؟
نهاية العطلة قربت .. واذا ما حكيت هلأ يلي بقلبي
بدي اروح ويمكن ما اشوفها مرة تانية
لازم اتجرأ واحكي
وفعلاً فتحت معها الموضوع
( ما رح احكي المحادثة كيف كانت بالتفصيل ) بس رح اقلكم انو وصلت معها بالحديث للنهاية
وفعلاً بهداك الوقت خبرتها اني معجب فيها .. وانو فيها اشياء كتير بتعجبني .. المهم اعترفت اني بحبها
ما حكت شي بالبداية
بعدين هي كمان حكت يلي بقلبها
وبادلتني نفس الشعور
كان اسعد يوم بحياتي
اول مرة بتصادم بانثى بهالشكل هاد
كملنا اليوم بشكل طبيعي
ويوم ورا يوم صارت لقاءاتنا طويلة .. نقعد مع بعض كتيير من الوقت وكلامنا صار زايد
نحكي مع بعض كتير واحيانا نسكر المحل ونتمشى بالسوق
كانت علاقة فعلاً حلوة .. وكان اول حب بحياتي
ضلينا على هالحالة .. لحتى انتهت الصيفية ورجعت انا لدراستي وهي ضلت تشتغل بنفس المحل
كملنا علاقتنا بمحادثات على التلفون .. وكنت ازورها من فترة لفترة
بس كانت المسافة بيناتنا كل يوم بتزيد
وعلاقتنا بتبرد
ويوم ورا يوم .. بلشت احس اني بعيد عنها كتير
وكلامنا صار قليل
لحتى انقطعت العلاقة نهائياً
وهالحكي هاد صرلو 4 سنين وما بعرف حالياً شو عم تعمل هلأ
او شو صار معها
كل يلي بقولو .. الله يسـرلها أمرها ويحميها ويسـعدها
كانت بالفعل .. مثال البنت المهذبة والمحترمة
وهي قصتي
منقووووووووووووول لعيونكم
موضوع: قصة حب 
25/8/2010, 18:55
