(اعقل بنات البشر في ذاتها خبله)

يسبل على دوحة العشاق همالي
برق ورعد في سحاب يسبقه وبله
غر الهماليل تسبل عقب الامحالي
يلين يطغى على فند الشجر حبله
تسعين ليل بروقه تشعل اشعالي
يفرح بها من طوى البيدا وساق ابله
ويفرح بها كل شيخ يمنع التالي
يقبل على الموت ويلاقيه كنه ابله
ويفرح بها عاشقين مالهم والي
والله لامثلهم عنتر ولا عبله
يسقي منازل عريب الجد والخالي
عديم وصف عليه الناس منهبله
يقبل ويقفي بقلبي (يابري حالي)
وانا على حالتي والكبد مندبله
ان اقبل اشوف خشف يشرح البالي
وان دبر الخشف يلعب فيني السبله
خشف يشارك معي في المر والحالي
حميه وفزعه وله طخمة قبله
ربعه لما جيتهم قام يتراوالي
ان الاسد فاق عن طواحته شبله
خشف يقدم على مليون رجالي
لكن عرق النساء لايجذبك حبله
تقول هذي معك بالحال والمالي
وان عدمت عندها ترقص على الطبله
اخذو كلام يدون ضمن الامثالي
((اعقل بنات البشر في ذاتها خبله))
والله ماجر مسحوبي وموالي
الا بيوت من الجزلات تسكب له
تلعب بهاجوس فكري ويتهيالي
جو يخلي بنات الفكر تطرب له
شربت فنجال ابو الطيب وفنجالي
ولاتوجهت لامشرق ولا قبله
ياراكب اللي يدرهم في الخلى الخالي
من جيش شيخ نهار الضيق يحسب له
تنحر بلاد بن جلعان طوالي
عطه الرساله ولاتنسى ووجب له
وابشر بترحيبه ووجار ودلالي
والطيب للظيف والكرمة تقرب له
عادات نسل القروم ونسل الابطالي
حارث ولد كعب جده مطلق حبله
حر بنى في صروح الشعر تمثالي
ينسب له الجزل والجزلات تنسب له