شو أرخص قهوة بعمّان ؟ أسعار سياحية

شو أرخص قهوة بعمّان ؟
أسعار سياحية

بنسمع كثير عن ” أسعار سياحية ” .. إشي سياحي وما بعرف شو , هل هاي مشكلة بالبلد ؟ برأيي مش مشكلة لما يكون موجود عدة كافيهات معروفة بهاي الشغلة . بس وين المشكلة بتصير ؟
المشكلة بتصير لما يصير أي كافيه صار حابب يصير سياحي , بس بدون ما يكون سياحي , كيف يعني ؟ يعني إنو تقعد إنتا وصحابك وتشرب كاسة عصير ويطلع الحساب عليك 6 دنانير .. بس هيك ؟ لأ في شرط ثاني , وهو إنه الجودة ما تكون راقية لمستوى الـ 6 دنانير اللي دفعتهم ..
يعني تروح على كافيه عالمي في عبدون وتدفع مبلغ وقدره مش مشكلة طول ما إنتا عم تتلقى خدمة راقية ومنتجات ذات جودة , بس المشكلة بتصير لما تروح على عمان القديمة , وما تخافو ما بحكي عن شارع الرينبو لإنو معروف مش رخيص زي عمان القديمة كلها .. أنا بحكي عن كافيه – بدون ذكر أسماء – بس موجود في منطقة قديمة وفاضية وفش
فيها حدا يا دوب البسس قاعدة بتقسدر , المهم كافيه زي هيك من وين إلو الحق يخلي الأسعار هيك ؟ هل أصبحت تسعيرات المقاهي غير خاضعة أبداً للرقابة و الجودة ؟ يعني هسة بفتح كافيه أبو صالح بحطو في حوش الدار وبعمل كاسة الشاي بليرتين وكل مكعب سكر بتحطو ع كاستك بدك تدفع نص ليرة .
إحنا عنا مشكلة بالمجتمع الكل طماع وبدو مصاري , بس ما حدا بهتم يتقن عمله .. أنا ليش أدفع 5 دنانير حق ” كبشة ” مكسرات صارت مع الضرائب و الخدمات 7.5 دينار لتغطية خسارة كافيه ما بيجي عليه حدا ؟ لإني متأكد كل واحد بجرب مرة وحدة وما برجع . بالمناسبة ما طلبنا مكسرات . وفكرناها ضيافة من المحل بس طلعت نازلة بالفاتورة
والواحد محترم حالو وبدوش يقعد يتمشكل مع المصاروة المحترمين عشان صاحب محل نصاب بقلهم إعملو هيك وهيك عشان أعطيكم راتب ..
هاذ الربح الفاحش و النصب هو مرض مجتمعي , الكل معوش مصاري مش مشكلة بس مش شرط تقلب نصاب عشان تربح .. أنا بعرف كافيه الأرجيلة فيه بدينار والطلب من نص دينار لـ دينار , وأنا متأكد من اللي بشوفو إنو الله طارحلو البركة ودايماً ملان زباين .
مش شرط عشان تربح تروح تنصب و تغلي الأسعار بفحش – وبشدد على نقطة إنو ما في جودة تزامناً مع السعر – , في المحاسبة أخذنا أساليب المنافسة .. منها إنو يا بتنافس بالكلفة , يعني بتكون الأقل كلفة بين المصنّعين .. أو بتنافس ع الجودة , يعني بتكون الأعلى جودة بين المصنّعين .. بس ما عمري سمعت عن منافسة بالسعر العالي و الجودة المتدنية
يعني الأخ قضى على كل مبادئ البزنس والإدارة .
على كل في النهاية بأمل من كل صاحب محل أو حدا ناوي يفتح محل بقرأ هاي المقالة إنو يكون واعي لوين هو عايش ووين محله موجود , ويربط الجودة بالسعر , ويحسن عمله وما يكون طماع لإنو دايماً ” إن الله لا يضيع أجر من أحسن عملا ” .. أما من أساء العمل وشغال حرمنة أكيد ما بجيب لحالو غير ” المسبة و السمعة العاطلة ” ..

ربنا ما يحرمنا من ابداعك الرائع

طبعا ما في شي رخيص و بالفعل كبها اسعار سياحية

الشغلة بدها شوية تفكير