الله أكبر ياخفوقي كل ماهب الهبوب
ماتحمل هالمحبه والغلا بدروبها
وأنا شمالي وأنكتب لي بالهوى عشق الجنوب
ماجذبني يمها كود البهى بأسلوبها
منزله عالي هنا...عزاه يالبنت اللعوب
ماسكنتي في حشايه دام أنا محبوبها
الهنوف اللي حضني طيبها من كل صوب
والبلا زينه كمل...من راسها ل عرقوبها
بالهداوه ياغناتي خافقي...خطر يذوب
كيف عاد النفس وده لك...تشق جيوبها
بالرضا طبعا كذا وأشواقها... دوبه يادوب
تلتمس منك العذر والضيق ماهو صوبها
دامك أغلى من سكنها غصب...وأطياف القلوب
لاضوت وأهداب عيني بالحلم فزوا بها
ياعذابي ياعذابي عاد حزات الغروب
جوها ماهو طبيعي ياحلا عذروبها
تضطرب نفسي وأدور للسلامه والهروب
والمصيبه جايز ٍلي وقفته وهروبها
كني أسمع صوتها لبيه يالصوت العذوب
مايهم القلب عندي لو شكى...ياعوبها!!!
ألبسيني لايهمك للعنا والحب ثوب
وأحتويني لاحضنتك والأماني دوبها
دوبها قالت عن أذنك والبنات البيض عوب
قلت خصي لا تعمي بالحشا مطلوبها
قالت أركد لاتغمز والبحر لجلك يروب
قلت عمري فدوة ٍلك بالخفا محسوبها
ياعيوني والله إني بالشعر كنت مهيوب
هيبتي شعشع سناها والملا دريو بها
مار عقب اليوم يفضح خافقي كل العيوب
المحبه عيبها تكشف خوافي ثوبها
إيه أحبك...لا وأحبك غصب ياظبي الجنوب
الصراحه دوم منجا لو غلب عذروبها