حزين تائهة

[ندعوك للتسجيل في المنتدى أو التعريف بنفسك لمعاينة هذه الصورة]


تايهه
كل ما أداوى جروحى ، ترجع تألمنى تانى
كل ما برجع لروحى، بتوه وأنا فى مكانى
بتوه عن نفسى، عن حلمى، عن كيانى
بتوه عن قلبى ، عن عمرى ن عن زمانى

بتوه
عن ناس حبتهم وحبونى
ناس غصب عنى وعنهم جرحونى
ناس بإسم الحب ظلمونى
ومن غير ما يدروا..................
جوايا توهونى

ناس علمونى أشتاق وأحب وإزاى أفكر


ناس دوقونى الشهد مر والصبر سكر
ناس فهمونى الدنيا صح وسابونى أقدر
لكن فاتونى تايهة وانا فى مكانى

وتايهة أنا
ولا الناس هما اللى تاهوا منى؟
عارفه مكانى ولا حبايبى عارفينى؟
فاكرة زمانى ولا زمانى هو اللى مستنى؟
عاشقه كيانى ولا كيانى هرب منى؟

وتايهة أنا ولا تاهت بيا الأماكن؟
وفرح ولا حزن فى قلبى ساكن؟
وعايشة ....... أيوه لكن،
أحلام ولا أحزان مستنيانى؟

وتايهة أنا جوايا ولا بعيد عنى؟
وقلبى بشوق ولهفة مستنى؟
الحب يجى من غير ما يألمنى؟
ويصالحنى على زمانى؟

وتايهة أنا
من قسوه الزمان ولا من الحبايب؟


من حب راح وكان القلب فيه دايب؟
من شباب العمر اللى اصبح شايب؟
وتايهة زيى دموعى برا عيونى
م الخد ده للخد ده وخدودى لامونى
م القلب ده للقلب ده وكلهم جرحونى
وتايهة حتى كلمتى بين الشفايف
مش عارفه الكلام ضايع منى ولا خايف
ولا تاهت الحروف من فوق لسانى
وتايهة انا بين نفسى، إحساسى ،وذاتى
بين دمعى ، غنايا ،وأهاتى
بين الى عدى واللى جاى من حياتى
بين الكلام والهمس وسكاتى
بدور ما بينهم يمكن ألاقى الأمان
يمكن أحس مرة واحده بالحنان
وأشعر للحظه بعطف الزمان
وابقى كإنى إتولدت من تانى