سندريلا الاردنيه
كان ياما كان
كان في بنت اسمها سندريلا كانت عايشه بخرابه مع ابوها المعلعل (ع حفه قبرو) ومرة ابوها خضرة وبناتها ضحى ووضحه وكانت العلاقه بين سندريلا ومرة ابوها زي العمى وبيوم من الايام صحيت العيله ولقت ابو سندريلا مفطرز صارت النسوان تولول وتشد بشعورها المهم بعد فترة صارت مرة ابو سندريلا خضرة تعذب بالمشحرة سندريلا وشلحتها مدرقتها ولبستها شوال زيتون وشلحتها الزنوبه ام وردة ولبستها كندرة مغيط (ام النص ليرة) المهم وصارت تروح تشم الهوا هي وبناتها وتترك الحزينه هذيك تشتغل لحالها
وبيوم من الايام اجالهم عزيمه غدا ع دار كبير القبيله
المهم والله ما سدقت خضرة هي وبناتها وصارن يزبطن بحالهن ويحطن هالحكل وحالتهن حاله وهالمدارق وما خلن سندريلا تيجي معهن
واجى يوم العزيمه وراحن وتركن البنت لحالها
طبعن سندريلا ما بتقدر توفت غدا ع حالها والله وقامت ولبست هالمدرقه ولفت هالاشار وراحت
بس وصلت يا حزركو شو كان الغدا ؟
اول ما فاتت ع الدار لقت سدور هالطرفان والمعاليق
والله وما سدقت ونزلت هجوم مسلح ع السدور
وحش ياللي بتحش اجا شافها ابن كبير القبيله واعجب بيها طبعا هذيك مش داريه عن اللي حواليها نازله نسف بالسدور المهم قامت زمت حالها وروحت قبل لا مرة ابوها تشوفها اجى قام لحقها الولد وهي بتركض فلتت فرده من الزنوبه وضلت طايرة المهم بعد كم يوم صار الولد يدور ع صاحبه الزنوبه (ام وردة) والله ووصل لبيت سندريلا وبعد طق الباب وفات طبعا خضرة وبناتها ما سدقن انو ابن كبير القبيله عندهم اجى سال مين صاحبه الزنوبه وصارت كل وحده تقيس بالزنوبه طبعا نمرتها كانت 43 وما اجت ع رجل وحده بيهن فاجا دور سندريلا وقاستها وفعلا اجت ع قدها
وفرح انو لقى صاحبه الزنوبه العملاقه وخضرة وبناتها راسهن انحرق من الغيرة
وهيك عاشت سندريلا عيشه الزوجات الاردنيات بس الشغله الايجابيه الوحيده هي انها بطلت تشتغل بالدار ... صارت تساعد حماتها بلقاط البندورة
وتوته توته خلصت الحتوته
اتمنى انها تعجبكم لا تحرمونا الردود
موضوع: سندريلا الاردنيه 
29/10/2009, 18:02
