أحمد حسن الزعبي :حكي عاطل (ألفاظ نيابية)
بنيته الضعيفة ووزنه الخفيف حالا دون تمكنه من خلع الباب بكتفه كما يفعل ابطال الأفلام المصرية ،فكلما جاء مندفعاً ليضرب الباب بكتفه..سقط أرضا، ثم لملم قواه ولملم صورته المبعثرة في عيون أولاده ، وغار من جديد..وعندما شعر ان هيبته بدأت تترنّح أمام أفراد العائلة الذين يراقبون المشهد .. تخلّى عن منطق العضلات ولجأ الى منطق التهديد اللفظي مدعوما ببعض الأدوات اللازمة مثل "قشاط" يحيى و"حفاية "عيشة:
- أبو يحيى: بقلّك افتح يا شلاش!!
- شلاش: بديش!!
- ابو يحيى: اذا ما فتحت الباب رح اقطع "القشاط" و"الحفاية" ع جلدك هه!!.
- شلاش: عندك ايّاهم همّه اللي بظلّوا يتحركشوا فيه!!
- ابو يحيى: بقلك افتح!! وبعدين بنتفاهم!!
- شلاش: بدك تضربني!!
- أبو يحيى: ولك افتح هسع!!
- شلاش: قول والله ما بتصيبني..!!
- ابو يحيى: الله يوخذك..بقول افتح!!
وبعد لحظات بدأ دوران المفتاح بشكل عكسي..وبدأ لسان القفل يعود الى حلقه بثلاث "طقات".. تبعه صرير خائف وانفراج بسيط في إحدى ضلفتي الباب ..دخل ابو يحيى بسرعة..أمسك بذراع "شلاش" ثم لواها خلف ظهره وبدأ يعاتبه..
- أبو يحيى: ولك الناس بتكبر وبتعقل ، انت بتكبر وبتنجن!!
- شلاش: مهو همّه..!!
- شلاش: شو مهو همّه!!..كل يوم يا بتهدد واحد..يا بتضرب واحد..يا بتسب ع واحد..مال طبعك منقلب!!
- شلاش: مهو همّه..!!
- ابو يحيى: كمان مش عيب عليك تحكي على أخوتك حكي عاطل و تغلط عليهم "بألفاظ نيابية": "هاظ بدّك تشلع لسانه من شروشه"..و"هاظ بدّك تقص لسانه"..و"هاظ بدك تدعس ع خشمه"..و"الثاني بتطول المسدس" بدك تطخّه..مش عيب عليك؟.."نواب استحوا يعملوا عمايلك"!!..
اعقل عاد!!
موضوع: حكي عاطل , الفاظ نابية احمد حسن الزعبي 
2/1/2012, 04:31
