سيد حجاب - مواويل من قلب الميدان
يا المجلس الأعلى احنا شعبك الأعلى
ولا أعلى منا سوى سبحانه جلّ علاه
ودى معاتبة بْمحبة لاغضبة ولا زعلة
...وطاعة الشعب واجبة بعد طاعة الله
يا المجلس الأعلى ..واحنا الأعلى والأوْلى
وانت وكيلنا وبتدير باسمنا الدولــــــــــــــة
ودى ثورة شعبية..واحنا وجيشنا إيد واحدة
ودى حاجة واضحة ومش محتاجة لمداولة
والشعب راجع وطالع ع الميدان دَيْدَبــــان
جاىْ يحمى ثورتنا من أعوان نظام الجبان
ودى ثورة شعبية مية المية سلميــــــــــــة
بتحطم القضبـــــــــــان .. وفاتحة البيبــان
الشعب راجع وطالع تانى يحمى الميدان
من الديدان اللى لســــه متبِّتة فى العيدان
ح نقيم ميزان العدل لجــــــــــل الجميع
وصاحب الحق ياخده واللى أجرم يدان
طالعين نطالب بحق الثورة والشهداء
من اللى قتلوا شبابنا وكانو أس الداء
من أول اللى اتخلع لولاده لعصابته
لكل مين خان بلدنا لصالح الأعداء
ازاى تحاكموا اللى قتلوا ع اللى سرقوه بس
مش ع الفساد اللى ســــاد واندس بينَّا ودس
وبذر بذور فتنة بينــــا لجــل ظُلمُه يســــود
وقتل شبابنا وقال انـــــــــــــــه عميل مُندس
ليه التراخى ف محاكمة خاين الأمــــــــــــــة
دى ضغوط؟! ومن بره ولا جوة ؟! مين هُمة ؟!
ولا انت صعبان عليك العشرة والمقامـــــات ؟!
دوس ع الضغوط واحنا ويـــــــاك ندفع الغمة
وليه حكومة شرف مغلولــــة اليدِّين
وفيها وزرا لمبارك مفسدين فاسدين
صبيانه لسه ..وفساده لسه فى الإدارات
بيشنوا ثورة مضادة ف كافة الميادين
لابد م الثورة لا مهادنة ولا استسلام
ولا مصالحة مع الداخلية والإعلام
غير لما يتطهروا من كافة الفاسدين
والأمن يرجع ويصنع شعبنا الأحلام
وليه ما فيش حد أدنى وأعلى لأجورنا
خدوا م اللى فوق للى تحت..الجوع ح يُقبرنا
مش كلنا شركا فى بلادنا احنا وولادنا؟!
فين العدالة اللى قُمنا لجلها وثُرْنا؟!
وليه تكيلوا بمكيالين يــــــــــا اخوانَّنا ؟ّ!
بتحاكموا زهرة شبابنا ف محكمة عسكر
وتحاكموا بالراحـــــــــة أفسدنا وأخونَّنا
ده ظلم بيِّن ولازم بابـــــــــــــــــه يتسكَّر
المجلس الأعلى جاى فى مهمة وطنيـــــــــــة
مش فض عركة ما بين ثورة ..ونظام أغوات
ولا بد من إجراءات ثورية فوريـــــــــــــــــة
ومش ح نرجع نحاور بعض فى متاهــــــــات
موضوع: رساله سيد حجاب الي المجلس العسكري 
4/11/2011, 16:51
