تبين الصدق

تبين الكذب ماحبك .. تبين الصدق مجنونك
فديتك وش بقى فيني .. مشاعر ما خذيتيها ؟


صباح الخير يا عمري ... صباح الخير وشلونك
دريتي باخر اخباري؟ .. شراييني وسكنتيها


وحشتيني من البارح ... يا بختي صرت مفتونك
اجي من حسرتي اشتم ... دقايق عني غبتيها


حياتي مالها معنى ... اذا لحظه تمر دونك
احاسيسي بدون اشعر ... اسرتيها وملكتيها


وش اللي يختلف عنهم؟ .. عناقيدك او غصونك؟
حسبتك مثلهم لكن .... أثاريكي قلبتيها


قلبتي الطاوله فعلا ... على مهل وعلى هونك
وغيرتي كثير اشياء .... ورديتي عدلتيها


وش اللي جابني يمك؟ غديها ضحكة سنونك؟

يجوز اصلا انا مدري .... اصدق لو ضحكتيها


وش اللي جابني يمك؟ غديها غمزة عيونك؟
يجوز اصلا انا مفتون ... اصدق لو رمشتيها


عجبتيني في كل حاجه ... من ابهامك الى متونك
جواهر بعضك وكلك ... باحاسيسك جمعتيها


يلوموني احبك؟ لا ..... من اللازم يلومونك
كتاباتي وأشعاري ..... مهو انتي كتبتيها !!


وقيعاني سقيتيها ..... سحايب وبلها مزونك
على كيفك على كيفك ... دخيل الله رويتيها


احبك! او تحبك ! او يحبك! او يحبـــونك
انا وروحي ووجداني ... وأحاسيس(ن) سلبتيها


امانه خبري اهلك ....امانه لا يهدونك
ترى شمس البشر تشكي .. بأنك جد سحرتيها


وعلى فكره قبل لحكي ... بأني صدق مجنونك
طلبتك قهوه وسكر... .. وكل مشاعري حرقتيها